Gubbe-blogg

03.01.2015:

Godt nyttår gode gubbar!  Eg reknar med at det vert eit godt treningsår.  Frammøtet første gong var iallefall lovande:  17 stk. og ikkje minst er det kjekt å sjå igjen gamle «kjende»:  Svein Arne og Ola Vågane var tilbake og det same var Ola Håheim.  Spesielt sistnemnde har vore lenge vekke.  Uansett: Her er namna: Anders, Asbjørn, Erling, B, Erling D, Jon-Kristoffer, Kjellaug, Kjell N, Kjell S, Magne, Ola H, Ola V, Roald, Rune, Svein Arne, Svein Å, Siw H og Turid.

Treninga:  Assisterande sjefstrenar Rune måtte nok ein gong trø til, noko han som vanleg ordna på ein framifrå måte.  Etter ei oppvarmingsrunde utom Bøafeltet vart det bakkeløp frå Jølvassbu camping til Øvrebø Hytter.  5 gonger opp bakken som er ca. 300m.  Sjølv om det var snøføre var det bra feste.  Ola V synte alle ryggen i dag.  Nærmast var Kjell N.  Elles var det varierande form på gjengen, men det er å vente.  No går det iallefall framover med alle.

Ver og føre:  Ca. 0 grader og lett snøver.

—————————-

10.01.2015:

Med stormen «Nina» som bakgrunnsteppe vart frammøtet litt under pari i dag.  Likevel – 10 stk. måtte ha sin dose, og det fekk dei.  Desse var:  Anders, Asbjørn, Erling B, Jon-Kristoffer, Kjell N, Kjell S, Ola H, Rune, Svein Arne og Svein Å.

Treninga:  Då sjefstrenaren har fått seg sin (minst) årlege skade, er det godt å ha ein assisterande som er her og som er skadefri.  Applaus!  Etter ein oppvarmingsrunde nedom Vassenden Sentrum og tilbake til Gjesdalsbrua  var alle meir eller mindre våte.  5 x 500m på sletta forbi garasje Rune var økta.  Det var sleipt og vått, men alle kom igjennom utan mèn.  Utan å vite det, vil ein tru at Navelsakers var først i løypa.  Kven som var nr. 3 er ein meir usikker på…. truleg var det Asbjørn.

Ver og føre:  Det var vind, det var is og slaps… Det regna og bles.  Ein sur dag, der ein kan la tankane vandre til fine sommardagar i 20 grader….

—————————–

17.01.2015:

Ver og føre er ikkje i vår favør, og skitrening er eit alternativ for nokre.  Men kl. 17:00 stod 11 forventningfulle sjeler og venta på trenar Rune sitt opplegg.  Desse 12 var:  Asbjørn, Dag, Kjell N, Kjell S, Ola H, Ola V, Roald, Rune,  Svein-Arne, Svein Å, Turid og Aase-Britt.

Treninga:  Rune hadde inspisert lendet og funne ut at beste staden å trene var like utanfor stovedøra.  Igjen vart sletta frå Gjesdalsbrua og innover arena.  4 x 1000m var menyen og vart lagt opp som tur/retur-løp.  Førstemann framme, så snudde dei andre også.  Pausane var 2-3 min.  Førstemann heile tida var Ola V.  Kjell N hadde god kontroll på 2.plassen.  Asbjørn og Aase-Britt «sloss» om 3.plassen.  Kjell S meinar at 1000m ikkje skal springast som intervall med som «distanse-trening»  (lengre pausar).   Her er ikkje alle einig, og vi bør kanskje drøfte dette meir formelt på eit kommande møte??  Uasett så vart opptil fleire tungpusta under økta, så det virkar no uansett.

Ver og føre:  Opphaldsver ca. 0 grader.  Forbausande bra akkurat der vi trena.

————————————-

24.01.2015:

I dag var det 23 varmegrader, sol og svak vind frå vest.  Svein Å kom på motorsykkel iført kun joggesko, shorts og hjelm..  Roald og Anders stilte med bar overkropp.   I lag med resten av gjengen tok dei kursen mot Golfbana akkompanert av fuglekvitter…   Nei og nei…. Slik var det så visst ikkje i dag, men drøyme kan vi!   Det var heile 14 stk som møtte i det sure vinterveret i dag:  Anders, Erling D, Jan, Johnny, Kjell N, Kjell S, Kjellaug, Ola H, Roald, Rune, Svein-Arne, Svein Å, Siw H og Aase-Britt.

Treninga:  Sjefstrenaren var tilbake etter skadeavbrekk og også Jan debuterte som uteløparar.  Det såg ut som begge hadde helde ting ved like då dei låg i fremste rekkje.  Jan var suveren i tet heile vegen i ei økt som er som skreddarsydd for han:  Bakkeløp.   I dag var det bakken opp Årsetbakkane som var arena.  5 gonger ca. 300m i sleip og tung snø.  Det var hardt for mange, andre tok det meir med tol…  Uansett:  Alle kom vel igjennom og kunne ta helg med godt samvit.

Ver og føre:  Det var rundt 0 grader og det sludda tett under heile økta.  Heller dårleg feste i motbakkane, men slikt blir det puls av..

————————————

31.01.2015:

Veret svingar og i dag hadde vi ein fin dag i Jølster.  Om det var dette gjorde at frammøtetalet gjekk litt ned vitast ikkje, men i dag var vi «berre» 10.  Desse var:  Anders, Erling D, Jan, Johnny, Kjell N, Leif, Roald, Rune, Siw H og Aase-Britt.

Treninga:  Det vart rapportert om berr asfalt midt i vegen på sørsida, så vi tok vegen dit.  Det skulle vise seg å vere så-som-så med den saken, då det mange stadar berre var glatt snø og is.  Inspirert av det fine veret vart det køyrt ei «vårøkt»:  1000-800-600-400-200m.  Pausane var frå 3 – 1 min.  Johnny var først i køen, og åpna såpass fort som 3.45.  med Kjell N. og Jan like i hælane.  Både Roald, Aase-Britt og Anders var så nær at dei var klar på streken med dei 3 første på andre draget (Applaus).  På det neste draget var stillingen den same, men på dei siste 3 draga var Jan først.  Det vart ei tung økt mykje grunna det varierande underlaget.  Heldigvis gjekk ingen overende.

Ver og føre:  ca. 0 grader, opphaldsver og vindstille.  Flott vinterver!

———————————

07.02.2015:

I dag var ein ny «kar» på besøk.  Det var Ole og var ein storm.  Tradisjonen tru er frammøtet godt når veret er dårleg.  16 stk. let seg høyre.  Her er desse:  Anders, Asbjørn, Dag, Erling D, Johnny, Kjell N, Kjell S, Kjellaug, Magne, Leif, Ola H, Roald, Rune, Siw H og Svein-Arne og Svein Å.

Treninga:  Etter ein oppvarmingsrunde ned til Leon Årseth vart kursen lagt tilbake til Jølvassbu Camping, der bakkeløp opptil Øvrebø Hytter venta.  Sjefstrenaren hadde planar om 6 gonger opp, men kom med framlegg om å redusere dette til 5 grunna det voldsomme veret.  Ingen protesterte!  Då Jan var vekk i dag var det Kjell N og Johnny som var i tet heile vegen.  Stort sett likt, men på siste draget fekk Kjell eit par meter.  Magne og Asbjørn hadde kontroll på dei neste plassane, men på siste draget var Svein Å oppe på 3.plass.  Elles hadde Svein-Arne eit «stunt» på siste draget med å ta teten dei første 150m, men ein ser at karen har kapasitet dersom han får skikk på kondisen!

Ver og føre:  Snøføyke, vind og heller ufyselege forhold.  Det var likevel sånn nokolunde feste oppover bakkane.

———————————

14.02.2015:

Ein merkedag og ikkje minst ein vakker dag for trening.  Merkedag fordi at vi i dag ikkje hadde trong for refeksvesten lenger.  Og frammøtet er strålande:  17 stk.  Anders, Dag, Erling D, Jan, Johnny, Jon-Kristoffer, Kjell N, Kjell S, Kjellaug, Leif, Ola H, Roald, Rune, Siw H, Svein-Arne, Svein Å og Aase-Britt.

Treninga:  I dag var det endeleg fast dekke under beina, iallefall der vi var – nemleg gangvegen i Vassenden Sentrum.  Her var det ei klassisk økt med 5 x 500m frå Bøafeltet og Hotellet.  Jan er ikkje god å skubbe seg på og var først heile vegen.   Det gjekk jamnt på 1.43-1.44-fart, som er ok.  10m bak han var Johnnyog Kjell N. i tett duell.  Så var det Jon-Kristoffer og så Aase-Britt som hadde hand om dei neste plassane.  Kjekt å kunne trakke til litt, sjølv om det kankje burde vore meir futt i»motoren»…

Ver og føre:  Ca. 0 grader, klarver og vindstille.  Flott å vere på trening.

——————————

21.02.2015:

Det er vinterferie-veke og nokre er på tur.  Likevel 12 stk. fann det best å møte for å få sin dose trening og prat.  EIn gamal kjenning Erik Kristian Steinset kom også.  Han har vore innom eit par gonger før.  Her er namna:  Anders, Dag, Erik-K, Erling D,  Jan, Johnny,Kjellaug,  Kjell S, Magne,Leif, Roald og Rune.

Treninga:  Det bar innover sørsida – for første gong på heilt snøfrie vegar!  Det var kjekt!  I solidaritet med dei som skal på Veteran-NM om 14 dagar vart det ei økt med litt meir fart og lengre pausar.  5 x 500m (Pause 3 min).  Nye-karen – Erik Kristian var sjef og først heile vegen.  God fart vart det også med desse tidene:  1.35-1.39-1.42.-1.38, 1.39.  Johnny var 10-15m bak med Jan i hælane.  Så var det eit godt stykke ned til neste gjeng.   Det var hardt for pusten og det var hardt for leggane, men alle kom seg heimatt utan mèn.

Ver og føre:  Ca. 4 grader.  Vindstille og opphaldsver.  Godt føre på sørsida.

——————————

28.02.2015:

Siste dag i februar vart ein forholdsvis fin dag for løparar.  Og det var det heile 17 stk. av i dag:  Anders, Asbjørn, Dag, Erling D, Jan, Jon-Kristoffer, Kjellaug, Kjell S, Leif, Magne, Ola H, Roald, Rune, Siw H, Svein Å, Svein-Arne og Aase-Britt.

Treninga:  I dag var det «sprintaren» Erling som fekk bestemme.  Først tok ein kursen innover sørsida til området rundt Kjelsneset.  Og då vart det – ikkje unaturleg – 200m intervallar.  12 stk..  Pausane vart litt lenger enn vanleg, så då måtte alle love å springe fort.  Det vert rapportert om at Jan var første heile vegen, og vi vil tru at Jon-Kristoffer ikkje er så langt bak.   Det vart uvant for beina dette, så fleire er nok litt såre i leggar og lår vil ein tru.

Ver og føre:  Ca. 5 grader og opphaldsver.  Glimrande for oss!

———————————–

07.03.2015:

Det er NM-helg og fleire frå gruppa var i Bergen og deltok der.  Dermed vart det litt tynnare i rekkene enn vanleg, men 8 stk. var på plass for å få svidd av nokre kaloriar:  Anders, Asbjørn, Erling D, Kjellaug, Leif, Roald, Rune og Aase-Britt.

Treninga:  Etter ein jobbetur inn til Kjelsneset og tilbake til Helmen var det klart for økta.  4 x 1000m.  Dette føregjekk med vending etter 500m slik at alle skulle vere sånn omtrent likt tilbake.  Aase-Britt nytta sjansen til å «sjefe» dvs ligge først.  Asbjørn og Roald var oppe og yppa seg, då det var ganske jamnt.   Det vart lange 1000m-metarar for dei dar bak, men det har dei truleg godt av…  🙂

Ver og føre:  Ein skikkeleg sur dag med regn og vind og nokre få pluss-grader.

————————————

14.03.2015:

Om veret var surt førre gong, var det desto betre i dag.  Sol frå skyfri himmel under heile økta, stilt og ca. 5 plussgrader.  Frammøtet var dobbelt så stort som sist dvs. 16 stk.  Desse var:  Anders, Asbjørn, Dag, Erling D, Jan, Johnny, Jon-Kristoffer, Kjellaug, Kjell N, Kjell S, Leif, Ola V, Roald, Rune, Siw H, og Svein-Arne.

Treninga:  På Bakkeslåttene skulle det heile føregå.  Det var 6 x 500m med 2 min pause.  Ola V var i dag verkeleg sjef og gjorde som han ville.  Spesielt siste draget gnistra det av, og dette er godt å sjå med tanke på stafett-sesongen som nærmar seg.  Jan og Kjell N hadde hand om dei neste plassane.  På 3 draget hadde Johnny fått opp dampen og hadde 2.plassen resten av økta.   Jon-Kristoffer skal også nemnast der han omtrent held følgje med tetgruppa heile vegen.  Bra!

Ver og føre:  Vi kan vel ikkje ha det finare midt i mars.  Våren er på gang og vi likar det!

——————————-

21.03.2015:

Vi stormar mot våren, og dag var det verkeleg ein vakker dag i Jølster…  Så vakker at mange truleg hadde gjort sitt i form av skiturar.  Så må det nemnast av vi har ein representant på Birken i dag – nemleg Erling B. Frammøtet i dag var på beskjedne 8 stk.  Det var:  Dag, Jan, Johnny, Kjell N, Magne Leif, Rune og Siw H.

Treninga:  Vi tok igjen turen ned på grusvegen på sørsida av elva.  Her vart følgjande gjennomført:  4 x 350m motbakke opp mot Bjørkelia og skihytta.  Her hadde Jan ein sterk serie med 1.23.1.25-1.28 og 1.28.  Kjell var bra med på første men, fekk det tungt etterkvart.  Johnny tok då over 2.plassen.  Til slutt sprang vi 600m + 400m heimover.  Her var Johnny ganske klart i tet, med Kjell og Jan deretter.  Mange var slitne etter dette.

Ver og føre:  Lettskya, vindstille og ca. 4 + grader.  Flott gitt!

——————————–

28.03.2015:

Palmelaurdag er det vel ingenting som heiter, men likevel det er i dag!  Og i dag fekk vi mange «årsdebutantar» på treninga:  Elias Slåtten , Sveinung Lien, Reidar Svalheim og Jens Berg.  Velkommen til dykk.  Vi var totalt 15 i dag og her er namna:  Anders, Dag, Elias, Erling B, Jan, Jens, Johnny, Kjell S, Leif, Ola H, Reidar, Roald, Rune, Svein Å og Sveinung.

Treninga:  Nok ein gong mot vest og grusvegen på sørsida av elva.  Først sprang vi 5 x 300m motbakke ved Flatabø, så var det 500m + 400m  på slettene innatt mot Vassenden.  Elias imponerte med god fart og tøff innstilling.  Han var først på alle motbakane.  Jan og Johnny var bak han og vidare var Sveinung sikker på 4.plass, medan Reidar imponerte med å ligge føre resten.  På første draget tilbake var Johnny først og på siste var han og Jan først.  Ei solid økt, der nokre var meir ferdig enn andre.

Ver og føre:  Ca. 7 grader men sur vind frå alle kantar.  Då takkar vi av mars for denne gongen og ser framover mot våren.

———————————

04.04.2015:

Då var vi komne i april, og i dag var det også påskeafta.  Då er det, som kjent, frivilleg å møte opp….??  Likevel var det 5 stk. som måtte ha sin vanlege start på helga.  Desse var: Anders, Dag, Jan, Leif og Rune.

Treninga:..  i dag gjekk føre seg omtrent på same stad som dei førre laurdagane – nemleg på grusvegen på sørsida av Jølstra.  Dagens «tekst» var 5 x 400m mellom bruene der ute.  Pausane var litt lengre enn Rune brukar å legge opp til, så då vart farten truleg høgre på draga…  Jan var i ein klasse for seg med klar leiing på  alle rundene.  Deretter var det forholdsvis jamnt, men Anders og Dag var vel dei som hadde fleste andreplassar.  Det blir rapportert om god stemning i feltet og at kyrkjeklokkene ringte både på ut-tur og inn-tur.

Ver og føre:  Sol, opphaldsver og ca. +3 grader.  Med andre ord:  Flotte tilhøve.

———————–

11.4.2015:

I dag kan vi slå fast at våren endeleg er komen med temperaturar på 13-14 grader tidlegare på dag.  Men, då vi skulle starte økta var vi nede i 7 grader med sur vind frå vest.  Og vi var denne gongen 12 personar:  Anders, Dag, Erling B, Erling D, Finn, Jan, Johnny, Kjell N, Magne, Reidar, Rune og Aase-Britt.

I dag hadde vi testløp – og det er sanneleg lenge sidan..  2000m var distansen, noko vi har sprunge mange gongar før.  Vi starta med Helmen slik at vi fekk nyte godt av medvinden innover.  Jan tok sigeren med knapp margin til Johnny.  Her er tidene:  Jan (7.24), Johnny (7.26), Finn (8.03), Magne (8.35), Aase-Britt(8.48), Reidar(9,06), Rune (9,07), Anders(9.11), Kjell S,(9.23), Erling B (9.45), Dag(.9.58).  Erling sprang 1500m på i underkant av 10min.  Som vanleg er det ekstra godt etterpå ei slik økt.

For dei som vi sjå si og andre si utvikling på distansen kan du klikke deg inn på knappen «testløp» her på sida.

Ver og føre:  Lett regn, vind frå vest og ca. 7 grader.  Ok det!

——————–

18.04.2015:

I dag hadde vi eit spesielt besøk:  Katrine Sele – for tida tilsett på Høgskulen i Sogndal – var innom for å snakka med oss, ta bilder av oss etc.  Kvifor det?  Jau, ho redar grunnen for eit prosjekt der det blir sett på kvifor folk i Sogn og Fjordane, etter å ha vore langt betre enn landssnittet, no ser ut til å sige nærmare akkurat dette.  Og kva snakkar vi om?  Jau, dette med levealder, livstilssjukdomar og innaktivitet…  Vår organisasjon er kanskje beviset på at nokre framleis held stand og nektar å la forfalle komme..  Det som blir resultatet av dette prosjektet skal publiserast på www.forskning.no   Så får vi følgje med der.

Tilbake til treninga:  I dag var vi «kun» 12 stk. som møttte.  Vi kunne glede oss over at yngste blad «Vågane» Jon kom.  Han har visstnok vore med ein gong før, men det må vere lenge sidan.  Her er namna:  Anders, Dag, Jon,  Jon Kristoffer, Johnny, Kjell N, Magne, Ola V, Roald, Rune, Siw H, og Svein-Arne.

Treninga:  Vi tok oss ut til H. Flatabø og der vart følgjande økt køyrd:  700m – 500m – 400m – 200m.  Pausane var ca. 2min.  Ola V var som venta først heile vegen og det med god margin.  Deretter kom det 3 løparar som alle skal til Sandane på KM Terrengløp i morgon:  Johnny, Kjell N, og Jon-Kristoffer.  Elles er Magne på veg framover i feltet etter lang tids akilles-trøbbel.  Sjølv om underlaget denne dagen var litt ujamnt etter nyleg skraping av vegen, sprang vi så pent vi kunne, slik at dama fekk fine biler!!!

Ver og føre:  Vind frå vest ca- 8 grader og opphaldsver.  Bra!

——————————–

25.04.2015:

Stafettsesongen er her og det er fleire som skal i elden i Olden i morgon.  Vi nemner Kjell N, Kjell Ø, Jan, Kjell-Olav, Jon-Kristoffer og ikkje minst Anders som i moden alder tek ansvar og reddar veteranlaget.  I dag var vi 12 som møtte (og like mange for heimatt)…!!  Anders, Erling B, Erling D, Finn, Johnny, Jon-Kristoffer, Kjellaug, Kjell N, Magne, Roald, Rune og Siw H.

Treninga:  Etter litt diskusjon vart det nok ein gong Bakkeslåttene vi enda opp på.  Sjefstrenaren meinte at vi måtte starte  jobben med å få opp fart og hurtigheit, slik at vårformen kunne få blomstre!  Ein ser at her er ein jobb å gjere, men vi er no i gang.  10 x 300m intervall var dagens økt.  Pause kun 1 min.  Johnny var først på alle draga, medan Kjell N, som skal springe i Olden i morgon, nok hadde meir å gje og heldt seg på 2. plass.  Finn, Magne og Roald følgde deretter.  Det gjekk greitt dette, og meir sånt skal det bli framover.

Ver og føre:  Surt ver i dag.  Regn og berre ca. 4 grader.  Heldigvis ikkje vind.  Vi er vel klar får meir vår no…

——————————-

02.05.2015:

Frammøtet var i dag under pari då berre 9 møtte.  Det var 8 som sprang, men Kjell N, som berre skulle innom å seie «hei», fekk for frammøtet (eller var det oppmøtet??)  Kanskje ei sak for kommande årsmøtet dette?  Uansett her er namna på dei som sprang:  Anders, Asbjørn, Dag, ErlingB, Jan , Johnny, Kjellaug og Magne.

Treninga:  For første gong i 2015 var Golfvegen staden for økta.  Vi starta litt «skånsomt» med 4 x 2min intervallar.  Pausane var frå 1,5 – 2min.  Jan var først heile vegen, med Johnny og Magne deretter.  Begge dei 2 sistnemnde skal springe Breimstafett i morgon, så det var vel ikkje max innsats.  Elles synes både Dag og Asbjørn at dette var uvant, men godt, etter lenger tids sjukdom og skade.

Ver og føre:  Sol frå skyfri himmel, men skikkeleg sur nordavind gjorde at det ikkje var meir enn såvidt vi heldt varmen.

———————–

09.05.2015:

Vi er midt i stafettsesongen, sjølv om det ikkje er så mange som konkurrerer.   Med 3 av gubbane representerte oss i dagens Holmenkollstafett:  Dag, ErlingB og Kjell N.  Dei sprang for Gloppen FIL og Tine (Erling).  Vi gratulerer!  Tilbake her heime var vi 10 stk. i dag:  Anders, Asbjørn, Erling D, Jan, Jon Kristoffer, Johnny, Kjellaug, Magne, Roald og Siw H.

Treninga:  Vi besøkte i dag den gamle «arènaen» Stampesletta.  Her har vi hatt mange gode økter opp igjennom åra, men ikkje så mange siste tida.  I dag vart følgjande sprunge:  2 x 500m – 2 x 400m – 2 x 300m. 2 x 200m.  Pauane var 3-2-1 min.  Johnny og Jan var som venta fremst, men Jon Kristoffer er no vorte veldig «nærgåande».. Det spørs om det er siste året vi held han bak oss?  Tidene i tet:  1.41-1.42-79-77-57-56-34-34.  Vi får seie oss nøgde med dette … Det er trass alt første økta av denne typen i vår..

Ver og føre:  Ca. 10 grader, men ein småsur nordavind var merkbar eine vegen på draga.

——————–

16.05.2015:

I dag var det verkeleg tynt i rekkene… Held vi på å legge ned???  🙂   Det var 5 som møtte og 4 som sprang.  Desse var Anders, Dag, Johnny, Roald og Aase-Britt.  Johnny har fått leggstrekk og må trene alternativt.

Treninga:  Dei fire andre tok turen ut på golfvegen der det er flotte forhold.  6 x 2min drag vart økta.  Her var Roald sjef i feltet og først på alle draga med Aase-Britt i hælane.  Vi har ikkje fått rapportar om kor langt dei kom, så farten er ukjent, men truleg høg….

Ver og føre:  Gråver og ca. 7 grader.  Ikkje nedbør, men like før.  Ikkje vår endå nei?

———————-

23.04.2015:

Det er ikkje så mykje vår å snakke om nei, og sjølv om frammøtet er ikkje er som det var nådde vi to-sifra (10.stk) i dag.  Det var Anders, Asbjørn, Erling D, Jan, Jon Kristoffer, Johnny, Kjell N, Magne, Roald og Siw H.   Sjefstrenaren er småskada og måtte gå i dag.   I og med at også ass-trenar Rune er ute, er gjengen overlatt til seg sjølve.  Men det klarar dei fint.

Treninga:  Det vart golfvegen igjen og 5 x 2 min intervallar.  Som venta var Jan først med Kjell N i hælane.  Jon-Kristoffer var også like der oppe og byr på meir og meir motstand.  Eit merke for denne økta er å komme opp i krysset til Bjørkelia.  Det klarte dei – faktisk 20m forbi!

Ver og føre:  Som sagt småsurt med regn i lufta og ca 5 grader.

———————–

30.05.2015:

Då er vi komne til siste laurdagen i mai.  Ein forholdsvis fin dag vart det for dei 8 som møtte.  Dei heldige i dag var:  Anders, Asbjørn, Johnny, Magne, Reidar, Roald, Turid  og Aase-Britt.  Kjekt å sjå Turid tilbake etter lang tids fråvær.

Treninga:  I dag var det området rundt Stampesletta som vart brukt.  Sjefstrenar Johnny er 4 veker unna NM og har hastverk med å komme i form.  Skadefri er han også, så dermed vart det tempo-trening i dag.  Økta var slik:  500m-400m-300m-200m.  (Start kvart 5.min).  Dette høyres lett ut, men når ein gamal kjenning, «mjølksyra», fekk komme på besøk, vart det tungt, og ikkje minst uvant.  I dag måtte alle springe full distanse og fekk høyre tida si.  Det vart synt gode takter der t.d. alle var greitt under 2min på første draget.  Johnny hadde teten heile vegen med Magne på 2. plass.  Vidare bakover veksla det veldig.  På siste draget var Reidar oppe på 2.plass, og syner at han har kapasitet.  Tidene i tet var:  1.30-72-52-32.  Forsåvidt greitt til å vere første gong.

Ver og føre:  Lettskya, vindstille og 10 grader.  Noko av det betre i år.

——————–

06.06.2015:

Jammen vart det 10 stk. i dag.  Det er bra sett i høve snittet siste vekene.  Dei heldige var:  Anders, Dag, Erling B, Erling K, Jan, Jon-Kristoffer, Kjell N, Magne, Roald og SiwH.

Karane tok «Golfrunden» i dag.  Den vart delt opp i 1 minutts drag.  Etter som ryktet seier vart det 9 stk.  Eit blikk på namnelista skulle vel tilseie at Jan, Jon-K og Kjell N låg langt framme.

——————

13.06.2015:

I dag møtte 7 stk.  til økta.  Gledeleg å sjå Sveinung på plass igjen!  Dei andre var: Anders, Dag, Erling K, Magne, Roald og  Siw H.

Det vart asfaltøkt på vegane innover mot Kjelsneset.  4 x 500m med bra pausar.  Sveinung tok likegodt teten med Magne i hælane.  Tider vart ikkje tatt, men det vert sagt at alle kom seg vel igjennom.

Ver og føre:  Litt betre enn på lenge.  Lettskya,litt vind og ca. 12 grader.  Det får vi vere nøgde med.

——————

20.06.2015:

Litt usikker på om vi skal rekne dette som ei offisiell økt, eller om vi er avslutta for sesongen??   Det var kun Erling B og Johnny som møtte.  Då sistnemnde går rundt med dårleg legg og ikkje kan springe særleg, reiste dei ut i Bjørkelia og køyrde 6 x 2 min intervallar opp bakkane.  Tungt som vanleg, men det var no godt å gå nedatt!

Ver og føre:  Det er første sommardagen i år!  Ca. 17 grader, sol og lite vind.  Jau, dette var godt.

***************************

OPPSUMMERING 1. HALVÅR 2015:

Vi har gjennomført ein sesong på det jamne.  Dessverre har vi det svakaste frammøtet på mange år: 11 stk. i snitt.  Spesielt siste månaden har det vore svak.  Det kan sjå ut til at mange har mykje dei skal rekke over, og treninga – iallefall hos oss – vert ofra.  Ja, ja, det er no forsåvidt verst for dei som ikkje møter.  Den som hadde fleste frammøte var Anders med Roald på ein god andreplass.  Så vidt eg kan sjå har ingen nye «gubbar» kome til denne sesongen.

Så over til det som absolutt må betrast:  Møteaktiviteten!  Er de klar over at det til hausten er 2 år sidan siste møte?  Sakene hopar seg opp og fleire av dei er snart utdaterte (i den grad det betyr noko som helst)!!  Tidleg i haust kjem det til å bli det «kick-off» med innlagt årsmøte.  Ver klar!

Så må vi med skam melde at vi ikkje hadde markèring og sommaravslutning med grilling osv. i år.  Det er første gong sidan lenge sidan og bør vere siste gong.  Skjerpings også der!!!!

Uansett. Velkomne til ny sesong laurdag 22.august.  🙂

——————————–

22.08.2015:

Då var vi i gong igjen og nok ein haustsesong ventar.  Som vanleg siste åra var frammøtet første dagen heller svakt i dag. Oppropslista var på plass (applaus til Roald), men to av dei om møtte var ikkje nemnde på lista!  Her er Roald knallhard:  Var du ikkje med siste halvåret er du «ute».  Dei som var her i dag var:  Anders, Asbjørn, Jon Vågane, Johnny, Magne og Svein-Arne.  Dvs. berre 6 stk.

Vi fann å besøke Stampesletta i dag.  Det er lenge sidan sist og her er det som oftast kjekt å vere.  Etter mykje knirk og ynking undervegs var alle vel framme til denne økta:  500-400-300-200 (Pause 2-1,5-1 min).  Lett og greitt skulle det vere, men at det var uvant kost, var det fleire som merka.  Johnny var suverèn i tet og hadde desse tidene:  1.36-75-53-34. Magne var først i gruppe to.  Spesielt kjekt at Svein-Arne, som har slite veldig med skrale kne siste åra, no er tilbake.  Måtte han få halde på!

Ver og føre:  22 grader, vindstille og overskya.  Kan ikkje bli betre.

——————————-

29.08.2015:

Sommaren ser ut til å vere over like fort som den kom.  I dag var det heller surt for dei 8 som møtte opp.  Dei var:  Anders, Erling B, Johnny, Kjell N, Kjellaug, Roald, Rune og Aase-Britt.  Kjellaug, som hadde vore med på Førde Opp, var innom for å få sitt kryss for oppmøte.  Det er greitt det.  Så var det kjekt å sjå Rune tilbake.  Han har slite med dårleg kne i lang tid og var i dag kun med på oppvarminga.  Det gjekk bra, så vi håpar at han snart er tilbake.

Treninga:  For første gong denne hausten: Golfvegen.  Intervallserien var 1-2-3-2-1min.  Pausar: 1-1,5-2,5-2.  Kjell og Johnny var suverene i tet.  Dei følgde kvarandre som skuggar, men Johnny fekk 20m på siste draget.  Aase-Britt sette resten av feltet på plass og ser ut til å vere i rute til Stolzen.   Regnet styrta ned i starten av økta, men etterkvart gjekk det over.

Ver og føre:  Som sagt så var det vått i dag.  Temperaturen var ca. 13 grader, så dette gjekk greitt.  Vi tålar jo som kjent ein støyt.

——————————-

05.09.2015:

Dette er dagen for fylkets eldste motbakkeløp – Trekktrasèen Opp.  Stemnet er i stor grad arrangert med gubbar i ulike gjeremål.  Dermed vart det lite med trening for mange.  Kanskje var her nokon som møtte likevel?

———————————–

12.09.2015:

Det er ikkje så voldsomt til frammøte, då folk er grådig opptekne på haustane ser det ut til.  Men, all honnør til dei som kjem og i dag var det 6 stk: Asbjørn, Erling D, Jan, Kjell S, Roald og Aase-Britt.   Veldig bra å sjå Kjell S tilbake etter vårens akilles-operasjon.  Då er han i gang med førebuinga til neste års stemner i 80-års-klassen!!  Hipp – hipp!!!

Treninga:  Då både sjefstrenar og assistent ikkje møtte, gjekk dette på sjølvstyr…  Likevel – her vart trena – denne gongen i lysløype-trasèen.  Her vart det sprunge motbakkeintervall – ca 300m lange drag.  6 repetisjonar vart det, og vår beste mann i denne øvinga var som venta Jan.  Vanskeleg å tippe kven som kan ha vore nummer to, men truleg var både Aase-Britt og Roald langt framme.

Ver og føre:  Det var igjen flott ver – mildt og fint.  Rundt 18 grader og greier!

———————————–

19.09.2015:

Ikkje 2-sifra frammøte endå, men ein meir enn sist – dvs 7 stk.  Her er namna:  Anders, Asbjørn, Erling B, Erling D, Kjell S, Leif og Aase-Britt.

Treninga:  Golfvegen Rundt i 1min-drag var dagens økt.  Det vart heile 10 repetisjonar før ein var tilbake til utgangspunktet. Så kan vi fortelje at einaste dame i feltet sette heile gjengen på plass.  Flott av Aase-Britt, men skjerp dykk karar!  Uheldigvis fekk gjengen eit skikkeleg regnskyll over seg, så dei var litt skikkeleg blaute før dei omsider kom seg heimatt.

Ver og føre:  Ja, som sagt det regna.  Temperaturen var rundt 12 grader.  Det haustast!

———————————–

26.09.2015:

I dag vakna vi til nysnø på toppane og småsurt ver.  Men når klokka vart fem, var det ganske så bra å springe.  Men, det var få som hadde funne ut at det var ein god plan då berre 6 stk. møtte.  Desse var:  Asbjørn, Dag, Finn, Johnny, Kjell S, og Leif.  Både Dag og Finn sesongdebuterte og godt er det at dei no er i gang.

Treninga:  Vi tok oss innover sørsida og besøkte den mykje omtykte «Stampesletta».  Her vart det tempo-intervall (iallefall for nokre).  2×500 + 2×400 + 2×300 +2x200m.  Pausar 3-2,5-2-1,5.  Johnny, som har pleia formen godt i sommar, var ikkje trua og hadde god avstand bak til Finn.  3-4-5 plassen var meir tett, då både Asbjørn, Leif og Kjell heldt i lag.  På slutten synte Leif seg som det sterkaste.  Tider i tet:  1.39-1.40-77-78-56-56-34-34.

Ver og føre: Det var vindstille 9 grader og grått.  Ok å trene ute ja…

——————————–

04.10.2015:

Vi er runda inn i oktober og mørketida nærmar seg.  Likevel det er fint å trene – det fann i allefall 8 gubbar ut denne dagen.  Desse var:  Anders, Asbjørn, Dag, Kjell S, Kjell S, Leif, Roald og Sverre (sykkel).  Då var Kjell Ø på plass også – det også eit teikn på at ny (ski)sesong nærmar seg.  Også kjekt å sjå Sverre igjen etter langt fråvær!

Treninga: Roald tok heldivis føringa då desse (såkalla) trenarane våre er over alle haugar -alle helgar…!!   Etter ein oppvarmingsrunde utover Bakkeslåttene vart det 6 x 2 min motbakkeintervall opp mot lysløypa.  Kjell Ø var som venta i tet og syner at han har helde oppe nivået i sommar.   Kven som var nummer 2 er sanneleg ikkje godt å seie… Skal vi tippe Asbjørn, Roald og Leif ??

Ver og føre:  ca. 10 grader, lettskya og fint.

——————————–

10.10.2015:

Kva var det som klaffa i dag???  Etter det «magraste» frammøtet på mange år så langt i haust, møtte brått 15 stk til trening i dag!   Her er namna:  Anders, Dag, Erling B, Jan, Jon-Kristoffer, Jon V, Kjell N, Kjell Ø, Magne, Leif, Roald (Sykkel), Rune, Svein-Arne, Sigurd V  og Aase-Britt.  Vi legg merke til at Sigurd Vågane var her.  Lurer på om det er første gongen?? Uansett:  Velkommen!

Trening:  Assisterande sjefstrenar Rune var på plass og då vart det ei «Rune-økt»:  4 x 1000m – der 1000meteren fungerer slik at når førstemann når 500m – snur alle og spring tilbake.  Dette føregjekk på Bakkeslåttene.  Referenten har ikkje fått opplyst kven som var i tet, men mitt tips er Kjell Ø med Jan og Kjell N i hælane.

Ver og føre:  Ca. 12 grader og fint ver.  Flott haust gitt!

——————————-

17.10.2015:

I vakker haustsol kom 10 smilande gubbar til møteplassen… Det var:  Asbjørn, Dag, Jan,Johnny, Kjell S, Kjell Ø, Magne, Leif, Roald og Rune.

Det er ei veke til vi skal ut i konkurranse i Lærdal så trenaren meinte at vi måtte køyre gjennom ein slags test.  Dermed jogga vi ned til Kvammen og grustaket der.  Tilbake til Jølvassbu er det 4,2 km.  Utanom Roald, som tok det pent grunna hofteplage, sprang gjengen i denne farten tilbake:  Kjell Ø: 16.47.  Jan: 18.21.  Johnny: 18.47.  Magne:20.15.  Leif:  21.19.  Asbjørn: 21.29.  Kjell S:  23.00.  Dag: 25.47.  Rune sprang ein svarveg, så han fekk ikkje godkjent tida (!!).

Ver og føre:  Vakkert haustver – klår himmel og ca. 7 grader var det.

——————————-

24.10.2015:

Ein historisk dag i vår historie:  Gubbetrimme reiste på utanbygdstur!  Og det heilt til Indre Sogn!  Det var sånn at vi først deltok på det flotte løpet «Galdane Rundt» i Lærdal for så å reise til Fretheim Hotell i Flåm og årsmøte med vidare der.  Desse gubbane var med på dette: Anders, Dag, Kjell N, Johnny, Magne, Ola H, Rune, Roald, Turid og Aase-Britt.  Så var det sånn at nokre var heime og trena der.  Her får vi rapport om at kun Leif møtte, men skal ha få for!!!

Løpet i Lærdal er 8,8km og ein kan velje mellom trim (utan tid) og konkurranse.  Av gubbane valgde Ola og Turid denne varianten.  Her er tider for dei andre:  Kjell (43.07), Johnny (46.32), Magne (48.16), Aase-Britt (51.09), Roald (52.48), Rune (59.41), Dag (60.06), Anders (61.12).  Kjell var klassevinnar i 60-64 klassen (Applaus!!).  Så skal det også nemnast at Eivind Øygard vann heile greia og sette ny løyperekord med tida 31.10.

Ver og føre:  Berre supert!  Lettskya ca. 12 grader og svak vind frå aust.  Dette likte vi og kanskje reiser vi innatt neste år??

——————————

31.10.2015:

Vel heime i bygda igjen var det kjekt å sjå at frammøtet var supert denne dagen:  15 stk.  Det var Anders, Asbjørn, Dag, ErlingB, Finn, Gyrid, Kjell N, Kjell S, Kjell Ø, Leif, Magne, Ola V, Roald, Rune, Svein Arne.

Sjefstrenaren er ute med skade.  Då er det godt at Rune er der.  I dag fann han ut at det skulle springast motbakkar.  Ei klassisk økt:  Frå Jølvassbu Camping og opp til Øvrebø Hytter.  Det er litt over 300m og vart sprunge 5 gonger.  Ola V viser at han er både yngre og sprekare enn dei fleste andre.  Kjekt var det også å høyre at den som bydde mest motstand – iallefall på slutten – var Gyrid.  Elles var nok Kjell`ane langt framme vil vi tru.

Ver og føre:  Litt surare i dag enn det vi har vore vande med.  Ca. 10 grader, grått og litt regn.

————————————-

07.11.2015:

Ja, då er det ikkje lenge til jul.  Dette har heldigvis vergudane ikkje fått med seg for vi køyrer i veg med 13-14 grader og flotte forhold.  Dette visste 9 stk. å nytte seg av:  Dag, Finn, Jan, Jon-Kristoffer, Kjell N, Leif, Magne, Rune og Siw H.

Treninga:  Nok ein gong måtte Rune ta ansvar.   For å feire det flotte veret vart det i dag 12 x 200m intervallar.  Etter ein oppvarmingsjogg ned til Halvard Flatabø vart det sprunge 9 stk. på slettene der.  Dei 3 siste gjekk austover og den siste vart det hardaste med avslutning ovanfor Jølvassbu.  Då var dei fleste nøgde og tykte det var godt å stoppe på.  Jan var i tet vert det sagt, men både Jon-Kristoffer og Kjell N var like bak.

—————–

14.11.2015:

I dag var verken sjefs- eller ass.sjefstrenar på plass.  Då er det godt å ha vedtaket frå Flåm på plass. som seier at den av dei frammøtte som står øverst på avkryssingslista er sjef.  Det vart Anders.   Dei som møtte var forutan han desse:  Dag, Jon V. Kjell N, Kjell Olav, Kjell S, Leif, Magne Ola V, Roald, og Svein Arne.  Altså 11 stk.

Treninga:  Økta var litt «ny» og føregjekk slik:  Start ved parkeringa på Vassenden Skule, så løp ca. 500m til oppkøyringa til Kyrkjesenteret og tilbake.  Når først mann var framme, snudde alle.  Dette gjorde dei heile 6 gonger (!) så det var ein solid dose dette.

Etter det vi forstår var Ola V i tet heile vegen.  Ut frå manntalet elles skulle vi meine at Kjell N og Kjell Olav burde ligge på dei neste plassane??

Ver og føre:  Ja, i dag var det brukbart ver.   Opphald iallefall.

——————

21.11.2015:

Rune var tilbake igjen som sjef…  Gjengen talde i dag 9 gubbar:  Anders, Dag, Erling D, Gyrid, Kjell S, Kjell Ø, Magne, Roald og Rune.  Med andre ord ikkje all verden, men sånn har trenden vore i haust.

Treninga:  Ute på Bakkeslåttene vart det i dag sprunge 500m, og det 6 stk.  Som vanleg med heller korte pausar.  Utan å vere sikker er det vel Kjell Ø som var først, og truleg også Gyrid på andreplass.  Uansett vart alle slitne etter den siste som gjekk oppatt til Jølvassbu.

Ver og føre:  Regn og surt var det, men som vanleg er det verst før ein startar.

——————

28.11.2015:

Tynt i rekkene i dag.  6 stk. inkl. ein halvskada sjefstrenar som berre var innom for å få eit kryss på lista.  Dei fem andre som sprang ute er:  Anders, Leif, Roald, Rune og Turid.

Treninga:  Det var surt og sleipt i dag.  Sludd er vel nesten det verste vi veit, og det var det i dag.  Likevel etter ein oppvarmingsrunde ned på Einehojen vart det sprunge 4 x 500m intervall frå Bøafeltet til Hotellet.  Det er ikkje sagt kven som låg først, men referenten sitt tips er Leif…  For å toppe økta sprange gjengen 3 spurtar på gangbrua over Jølstra som var heilt snøfri!

Ver og føre:  ja, det var ein sur dag med sludd og regn og dårleg føre.  Vi håpar det er ein overgang til noko betre.

———————-

05.12.2015:

Då var vi komne i desember og brått var det betre å vere løpar.  Dei 9 som møtte fekk oppleve godt feste og ok forhold.  Dei som var her var:  Anders, Erling D, Gyrid, Kjell Olav, Kjell Ø, Leif, Roald, Rune og Aase-Britt.

Treninga:  I dag var det tid for juletentamen.  I «alle» år har vi klart den heller tunge økta med 20 x 200m intervallar sånn like før jul.  Så også i år!.  Opp i gjennom åra har vi ofte kjempa med dårlege forhold, men i dag var det slett ikkje så verst.  Økta føregjekk i år på sletta ved Solrenning Camping – altså omtrent på trappa til Rune og Roald!  Kjell Ø var i tet i lag med Kjell Olav.  Gyrid var også langt framme.  Godt at vi kan logge dette som gjennomført også i år!  Vil likevel tru at nokre feltet fekk ei solid gangsperre etter dette.  Tenker spesielt på Aase-Britt som verkeleg har vore i høgda – dvs. Himalaya i 3 veker!!

Ver og føre:  Det var litt regn, men det var +-grader og fint å springe.

————————–

12.12.2015:

Siste ordinære fellestrening i 2015, då det neste laurdag blir ein «lett-versjon» med påfølgjande julebord!  I dag var det så vidt 2-sifra, då 10 stk. møtte.  Johnny var innom for å få kryss før han nok ein gong forsvant i Svidalen Grendahus for å trene alternativt.  Dei ni som sprang ute var:  Anders, Asbjørn, Dag, Kjell N, Kjell S, Magne, Leif, Roald og Rune.

Treninga:  Det var småglatt så ass. sjefstrenar Rune tok gjengen med seg ut på slettene på sørsida av Jølstra.  Frå Jølvassbu til «kloppa» og tilbake går det ca. 4min.  Dette vart sprunge 4 gonger.  Pausar var vel ca. 1,5min.  Kjell N var først heile vegen, og vidare trur vi Magne hadde andreplassen.

Ver og føre:  Ca. 0 grader – opphaldsver og lettskya.  Godt det etter veker med regn!  Ok på grusvegen.