Onsdagstreningar 2009
07.01.2009:
Første onsdagstrening i 2009. Frammøtet i kveld: Asbjørn, Ivar Andrè, Kjell N, Johnny og Magne.
Treninga: 4x1000m intervall (2min pause) var kveldens meny. Sjølv på snøføre gjekk det ganske greitt, og Ivar var suverèn i tet med bestetid på 3.30. Ei tøff økt – og det må til.
Ver og føre: -5 grader vindstille og månelyst. Ein flott kveld.
——————————
14.01.2009:
Ein hard kjerne held stand: Asbjørn, Dag, Ivar-Andrè, Kjell N og Johnny var her i kveld.
Treninga: Motbakkeintervall i Bjørkelia vart kveldens meny. 5x2min (pause i overkant av 1min). Ivar er no så langt føre at vi har problem med å få stoppa han, når tida er der….Det bør vi andre sikkert prøve å gjere noko med…
Ver og føre: Ca – 3 og vindstille. Grusføre og elles ein fin kveld.
—————-
21.01.2009:
På plass ved Gjesthalla kl. 19:30 kunne ein registrere desse frammøtte: Asbjørn, Dag, Ivar Andrè og Magne.
Treninga: Litt småglatt var det så det vart motbakkeløp. I Indre Gjesdalsvegen vart 6×350 drag køyrt. Ivar var som venta først, men det vert rapportert om at Magne var nærmare enn vanleg!
Ver og føre: Ca. +3 grader, vindstille og yr.
——————————-
28.01.2009:
Frammøtet er omtrent som vanleg. I dag kom 6 stk: Asbjørn, Dag, Erlend, Ivar Andrè, Johnny og Kjell N.
Trening: Inne på sørsida vart følgande økt gjennomført: 1000-800-600-400-200m intervall. Ivar var som venta i tet med Kjell N i hælane. Det gjekk bra fort med 3.20 på første 1000m. Elles må både Dag og Johnny halde litt igjen med sine litt kranglete «undersåttar».
Ver og føre: 0 grader vindsille og tørr asfalt. Flott!
—————–
04.02.2009:
Den harde kjerne stillte nok ein gong (dvs. med unntak av Asbjørn alltid møter..). Då var det desse i dag: Dag, Ivar-Andrè, Johnny, Kjell N og Magne.
Treninga: Det var komme litt nysnø, så vi måtte ty til motbakkane. 5x2min motbakkedrag i Bjørkelia var som vanleg tungt, men vi trur no at det vil virke på sikt!!! Ivar var einsam der framme, så kom Kjell heilt til siste drag der Magne nok ein gong yppar seg og viser at han er betre enn på mange år.
Ver og føre: Ca -4 grader, vindstille og lett puddersnø. Småglatt.
——————-
11.02.2009:
På ein flott kveld for skigåing, møtte 3 stk. for å springe: Asbjørn, Ivar-Andrè og Johnny.
Treninga: Snøføre og småkaldt var det, men i motbakken i Indre Gjesdal var det godt føre. Her sprang vi 6 x bakkedrag frå 350-450m. Det var ordna forhold i rekkefølga: Ivar-Johnny-Asbjørn. Som vanleg var det tungt, men det har vore verre, så vi er kanskje i betre form??
Ver og føre: -5 grader, stille og snøføre. Ein fin kveld!
————————–
18.02.2009:
I kveld var frammøtet kun 3: Ivar-A, Magne og Kjell N. Asbjørn dukka opp på slutten. Litt forkjøla så han køyre eige opplegg.
Trening: Det vart sprunge 6x500m i området Stampesletta. Ivar køyrde hardt i tet, så både Kjell og Magne måtte ta skikkeleg i for å halde sånn nokolunde følgje.
Ver og føre: +4 grader lett regn og vindstille.
————————-
25.02.2009:
4 mann på plass – trass vinterferietid: Dag, Ivar-Andrè, Johnny og Magne.
Treininga: Det var skikkeleg slapseføre og surt ver då vi jogga innover sørsida. Då vi kom tilbake til Gjesdalsvegen letta veret og det gjekk tåleg bra å springe. Ivar heldt god fart så det var langt bak til nr.2-3 og 4. 6 bakkedrag vart det, og som vanleg gjekk det siste heilt til topps.
Ver og føre: Ca. 0 grader, sludd og littt vind frå vest. Sleipt føre…
———————–
04.03.2009:
Som sist var vi igjen 4, og dei same som sist onsdag: Dag, Ivar-Andrè, Johnny og Magne.
Treninga: I kveld skulle vi ha langintervall. Vi jogga innover mot Stampesletta for å prøve der. Grunna ein voldsom sur austavind delte vi opp 1000meteren innover i to delar. Økta var slik: 2×500+1×1000+2×500+1×1000+2×500. Ivar var som venta fremst med tider på 1.45 og 3.32. Dei siste tre draga måtte vi andre greie oss sjølve då Ivar måtte tørke litt naseblod (alt vel etter 5min). Ei økt som kjendest var det iallefall.
Ver og føre: Ca. 3 grader og sterk vind frå aust. Stort sett berr veg, men enkelte stader var det skummelt glatt.
—————————–
11.03.2008:
Den harde kjerne var på plass. I kveld var også Asbjørn tilbake. I tillegg var Dag, Ivar, Johnny og Magne her – altså 5 stk.
Treninga: Ein «klassikar» var kveldens økt: 5x2min bakkeintervall i Bjørkelia. Ivar var som venta først, men både Magne og Asbjørn viser styrke med å ligge på 2. og 3.plass på dei tre siste draga. Turen nedatt var som vanleg kjekkare enn den opp.
Ver og føre: Klart, vindstille ca. 0 grader. Berr veg og ypperleg å springe.
———————–
18.03.2009:
Eit vårteikn åpenbara seg i kveld: Finn Årdal kom på trening!!!. Dermed var vi desse karane i kveld: Asbjørn, Finn, Ivar-Andrè, Johnny og Magne.
Treninga: Etter 2km oppvarming innover sørsida, sprang vi ein hurtig langtur på 5km. Ivar var langt føre og langt ned på 18-talet. Deretter kom Finn, Magne, Asbjørn og Johnny. Finn dokumenter at formen er på veg og nok vert endå betre framover våren. Asbjørn imponerer nok ein gong og har funne seg tilrette på godt nivå.
Ver og føre: Ca. 3 +grader, vindstille og ein fin kveld.
——————–
25.03.2009:
Siste onsdagstrening i dunkel belysning. Til helga skal vi stille klokka fram… Den harde kjerne var på plass som vanleg: Asbjørn, Ivar-Andrè, Johnny og Magne.
Treninga: Det er glimrande føre på grusvegen på Bakkeslåttene. Her vart det i kveld sprunge sånn intervall: 1000m-800m-600m-400m-200m. Ei god økt, sjølv om både Magne og Johnny hadde unnskyldningar å komme med kvifor dei ikkje sprang fortare: Magne med sår nase og Johnny med sår legg/akilles. Dei to andre feilar det ingen ting og det såg vi. Ivar vann første drag med 100m, sidane vart det mindre.
Ver og føre: Vindstille – 3 +grader og mjukt og fint å springe.
———————
15.04.2009:
Det tynnast ut i rekkene, då både Asbjørn og Johnny er ute med skade. Det var likevel 3 som kom i kveld: Dag, Ivar-Andrè og Kjell N.
Etter det ein har fått melding om vart det sprunge intervall: 200-400-600-600-400-200m. Ivar var sjef og først på alle drag.
Ver og føre: ca. +5grader og vindstille. Ein fin kveld for trening.
————————–
22.04.2009:
Ei litt rar blanding på frammøte-plassen i dag: 3 løparar og 2 sykkelistar. Dag, Kjell N og Magne sprang og Ivar-Andrè og Johnny sykla. Dei to siste er inn i «skavank-klassen» der ein frå før har andre. Vi får tru alle er springbare om kort tid.
Treninga: Formen skal skjerpast framfor føreståande konkurransar. Sjefstrenaren kommanderte (frå sykkelsetet) 600m + 400m i konkurranse fart. Pausen vart ca. 7min. Tider på 600m: Kjell (1.45), Magne (1.52) Dag (2.00). Dette er bra karar! Så vart det ein 400m i omtrent same farten etterpå, der Magne og Kjell hadde 68.
Ver og føre: Klart og stille. Ca. 5+ grader. Flott å vere ute!
—————-
13.05.2009:
Stafettane er omtrent over, men vi har bestemt oss for å halde onsdagstreningane gåande. I dag var frammøtet lite, men dog… Ivar og Kjell var på plass.
Treninga: Gutane køyrde 10x200m intervall. Kjell var lite føre heile tida – sikkert fordi han hadde nye løpssko!!!
Ver og føre: 13 grader og vindstille. Flott å trene sånne kveldar.
—————–
20.05.2009:
Nei, i kveld var det flott du… Sol og vindstille… 5 mann møtte i dag. Ivar-Andre, Johnny, Kjell N, Kjell Ø og Oddvin.
Treninga: I dag prøvde vi noko «nytt». Først roleg langturfart ned til toppen av grustaket i Kvammen. Så var det fri fart heimatt via nedre runden på golfvegen. Distansen er omtrent 4km. Her er tidene: Kjell Ø (15.47), Ivar A (16.07), Kjell N (17.07), Johnny (18.13). Oddvin køyrde eige opplegg.
Som sagt: Ein flott vårkveld med ca. 15 grader.
———————-
27.05.2009:
Ein sur kveld med regn og kjølig ver. Likevel – den harde kjerne på plass: Ivar-Andre, Johnny og Kjell N.
Treninga: Ei god gammal tungøkt i dag. 4x2min motbakkedrag opp Bjørkeli-vegen. Pause 1min. Som venta var Ivar-A eit godt stykke føre oss andre. Det gjekk fort, for så langt har vi ikkje komme før.
Ver og føre: Det regna og ca. 5 grader. Vi får tru det er lenge til neste gong det er naglebit på trening.
————————
03.06.2009:
Tre gubbar stakk til Markane på Nordfjordkarusell. Det var Kjell N, Ivar-A og Johnny. Her var det 6km terrengløp på den gamle postvegen. Eit flott løp der Kjell vann si klasse. På heimebane var det då kun Magne som møtte.
————————-
10.06.2009:
Magne og Johnny var på plass som dei einaste denne kvelden. Det vart gjennomført ei god økt rundt Golfvegen. 3x3min drag. Johnny var først på dei 2 første, men vart sett dugeleg på plass på siste draget.
————————-
17.06.2009:
Ein fin førsommarskveld møtte 4 gode løparar til dyst: Ivar-A, Johnny, Kjell N og Magne.
Treninga: Ei ny økt skulle prøvast: Finn din km-fart på 10km og spring 1km 10 sek fortare..Pausar kun 1min. Vi sprang 4x1000m i kveld og som det skulle vere var Ivar først. 3.31-3.38-3.39-3.22 vart hans tider. Kjell N hadde ein trygg 2.plass. Ei grei økt som vil bli auka med fleire repetisjonar utover.
Ver og føre: 16 grader og vindstille. Veldig gode forhold.
————————-
24.06.2009:
Nei, vi tek ikkje sommarferie i avdeling «Onsdags-gubbe-trimmen» nei… I dag var vi rett nok få , men vi som var der synes vi er ganske gode: Ivar-A og Johnny
Her skal køyrast fart, og fart vart det. 6x300m (Pause 2-3min). Farten låg rundt 50sek med 2 løp ned på 49. Johnny var først på 4 av draga og Ivar på 2, men vi var ganske jamne. Slikt kostar det veit ein av erfaring, så vi var ganske så salige etterpå.
Ver og føre: Det er sommar. 24 grader, sol og vinstille. Max!!!
—————–
01.07.2009:
Vi er komen inn i den verkelege sommarmånaden, så frammøtet framover vil nok bli prega av det. I dag var vi igjen kun Ivar-A og Johnny på plass.
Økta i dag var 4x2min i golfvegen. (Pause 1,5min). Ivar var godt føre, delvis fordi Johnny har vore litt nede nokre dagar med ryggplager og sparte seg litt i dag… Det gjekk godt unna då Ivar var komen ca. 80m innover vegen frå brakka på siste draget.
Ver og føre: Full sommar. Ca. 24 grader sol og vindstille. Suverent!!!
————————-
15.07.2009:
I dag var igjen kun Ivar-A og Johnny på plass… Lurer på om dei andre gubbane trenar?? Vi får sjå til hausten….
Uansett: I dag var det 4x2min (1min pause) oppover Bjørkelia-vegen. Ivar i nye konkurransesko var lett på foten, så Johnny vart som statist å rekne…. Trur ikkje vi har komme så langt på 4 drag før.
Ver og føre: Vi trena like etter ei solid regnbyge, så lufta var frisk og tempen ca. 16 grader.. Flotte forhold..
——————-
22.07.2009:
Frammøtet som sist – og gongen før det: Ivar-A og Johnny.
Johnny har hatt ein god treningsperiode nokre veker no og hadde så smått sikta seg inn på Veteran-NM i Moss i august. Men, det var vel ikkje anna å vente at dette måtte gå gale. I dag vart det først køyrt 1x500m: Johnny (1.25) Ivar (1.30), men på andre 500m vart det bråstopp for Johnny: Lårstrekk… så det var berre å halte seg heimatt….Sånn går det når ein gir gass…
Ver og føre: Flott var det med 16 grader overskya og vindstille.
——————————–
05.08.2009:
To «smårustne» herre på plass i dag. Ivar har halvmaraton, Storehesten og Hafstadfjellet + + bak seg siste 4 dagane. Johnny tilbake etter strekk og alternativ trening med motbakkegange og tunge lår.
Treninga: På Bakkeslåttene sprang ein 4x400m. Ivar sette standarden med fart rundt 70 og det var hardt nok. Han var først på 3 av draga, men på siste draget var Johnny åleine i tet… Hardt men godt for kroppen.
Ver og føre: Lett regn, 17 grader og vindstille. Flott å vere ute…
—————————–
18.11.2009:
Så er vi i gang igjen med onsdagstreninga. Det har vore svært mykje skadar i gjengen i sommar og haust, men no ser det ut som det skal ordne seg. I kveld var Asbjørn, Kjell N, Johnny og Ivar på plass.
Vi tok kursen ut på Bakkeslåttene og der spang vi 6x450m med pause på ca. 1-1.5 min. Det starta roleg, men farten auka etterkvart. Ivar var først på tre – Johnny på eitt. Vi hadde planlagt å ikkje gå «heilt i kjellaren, og det klarte vi.
Ver og føre: ca. 6 grader vindstille og flott springever…
—————————–
25.11.2009:
I dag var ikkje Kjell her, men dei tre andre var på plass.
Turen var lagt innover sørsida, der 4x1000m venta. Pausar på 1-1,5min. Farten var ikkje max, men det var hardt nok. Ivar var suveren med snitt-tider rundt 3.40. Johnny var ca. 20 sek. bak.
Ver og føre: Austavind, men grei temperatur, så det vart ein ok kveld.
———————–
02.12.2009:
Så er vi runda inn i julemånaden, men trenast skal det for det… I kveld – den harde kjerne: Ivar, Johnny og Kjell N.
Treninga: Tynt snødekke og månelys…. Det vart intervallar 8x450m på Bakkeslåttene. Pause like over minuttet og farten låg mellom 1.25-1.27. Ivar var 10m føre Johnny. Kjell kjem nærmare og nærmare, og er no snart framme der han høyrer heime.
Ver og føre: Fantastisk kveld for oss. Månelys, stille og nysnø. Flott serru….
———————
09.12.2009:
Vår vesle alternative treningsgruppe held stand. I kveld var vi igjen 4 stk. Dag var på plass for første gong i haust, og det er bra. Dermed var det slik: Asbjørn, Dag, Ivar og Johnny.
Treninga: 5x1000m m.2 min pause var økta. Dvs. Ivar sprang 5x1000m. Vi andre sprang litt mindre. Ivar hadde tider frå 3.45-3.39, og det er godkjent. Dag og Asbjørn var eit stykke bak i starten, men på siste draget var dei nær Johnny.
Ver og føre: Heilt fantastisk å vere løpar i Jølster for tida. I kveld var det +8 grader og vindstille. Kan ikkje bli betre i desember.
—————————
16.12.2009:
Rekordframmøte på onsdagstreninga i haust. 5 stk. Ikkje så mange, men rekord er rekord. Her er namna: Asbjørn, Ivar, Johnny, Kjell N og Magne.
Treninga: Motbakkane opp Bjørkelia var arena i dag. 4x2min med 1 min pause. Det var øye tungt! Ivar var som venta eit stykke føre, men vi klarar endå å rope fram når det er slutt på draget. Magne var stort sett nr.2 heile vegen.
Ver og føre: Det var kaldt. ca. -7 grader og vindstille. Litt av ein overgang frå forrige gong.
————————
30.12.2009:
Sesongens siste onsdagstrening gjekk rekordtidleg på dag: Kl.15:00. Det var kalla inn til samling for stafettkandidatar, og om frammøtet her står i stil til utøvarar som tenker å vere med, har vi kun veteranlag i år. Desse var på plass: Asbjørn, Ivar, Jan, Johnny, Kjell N og Kjell Ø. Det var 6 stk. det.
Treninga: Det var kaldt, så det vart til at vi tok oss fram til Gjesdal Indre og motbakkane der. Her var det 5x350m + 1x450m motbakkeintervall. Ivar var først på dei 5 første, medan Jan tok sigeren på den lange opp til toppen. I det heile ei solid økt av Jan i dag.
Ver og føre: Ca. 11 grader minus og klårver. Bra feste i snøen.