Gubbe-blogg

30.05.2011:

Så er vi i gang med banesesongen.  Første trening på Førde Stadion i dag.  Desse møtte:  Asbjørn, Johnny, Reidar og Sverre.

Det må gå høveleg føre seg så leggar og andre undersåttar tåler det uvante dekket.  Etter oppvarming med stigningsløp var det 5x150m med aksellersjon.  Det gjekk greitt der ingen kjende anna enn det som godt var.

Ver og føre:  Litt vått, men då vi trena var det bra.  Temp. ca. 12 grader.

———————–

06.06.2011:

På plass i dag var desse:  Asbjørn, Kjell, Johnny og Oddvin.

Økta i dag var litt tøffare enn sist:  6 x 200m m. 200m gang mellom.  Det høyres ikkje så voldsomt ut, men det var bra fart på alle, der førstemann (Johnny) hadde tider mellom 31.6 og 32.1.    Den gode kjensla etter ei god økt gav varsel om at dette kan bli bra utover.  Men, her er plass til fleire.   Kor er forresten resten av «bronselaget»??

Ver og føre:  Lett regn, vindstille og 12 grader … Heilt ok.

—————————

13.06.2011:

Ein grei gjeng var på plass på Førde Stadion – denne gongen kl. 19:00.  Det var:  Jan, Johnny, Kjell N, Leif og Oddvin.

Vi aukar distansen:  5 x 300m (Pause 3min).  Farten var slik i tet:  51.0 – 50.4 – 50.0 – 52.6 – 51.4.  Johnny og Kjell var først på dei 2 første. Så kom Jan opp på nr. 3.  Så fekk Johnny strekk og måtte stoppe og resten av økta var Kjell N. suverèn.    Dette tok på for dei som fullførte alle.  Sjefstrenaren håpar strekken er av det «sympatiske slaget».

Ver og føre:  Endeleg ein sommardag.  16-17 grader lett vind og sol.  Flott…

———————–

20.06.2011:

Beste oppmøtet så langt.  6 stk.  Asbjørn, Kjell N, Johnny, Oddvin, Reidar og Sverre.

3 x 600m -pause 400m gang var dagens meny.  Dvs. sprintarane Reidar og Oddvin fekk stoppe på 400m, medan Sverre køyrde sitt eige løp.  Kjell og Johnny låg likt på alle draga medan Asbjørn var ca. 10 sek bak.  Tider:  1.55-1.48-1.55.

Ver og føre:  Sommardag med 17-18 grader og sol.  Flott å vere på bana då.

————————–

27.06.2011:

Det er 2 månadar igjen til NM Veteran.  Her er mykje arbeid som skal gjerast, men her er framgang å spore.  I dag kom «kun» 3 stk:  Johnny, Kjell N og Sverre.

Ein klassisk baneøkt i dag:  4x400m med 400m gang mellom kvart drag.  Sverre fekk lov å stoppe etter 200m.  Målet var å springe alle under 70 sek, og det gjorde vi.  68.9-69.0-68.6-68.0.  Kjell og Johnny var så godt som likt og truleg like slitne.

Ver og føre:  Det er vått i dag, men akkurat når vi var på bana var det så godt som opphald.  Fin temp – ca. 15 grader.

——————

04.07.2011:

Folk er starta på ferie og nokre er alt reiste vekk.  Men, nokre var i bygda og tok turen til Førde Stadion denne ettermiddagen:  Jan, Kjell N, Oddvin og Reidar.

8x200m intervall med 200m gangpause var foreskrevet «medisin» av sjefstrenaren (som forøvig køyrde same økta i Larvik).  Etter det ein har høyrt sette Reidar ut i eit j… tempo.  Men, så på tredje draget kom strekken.  Det vart full stopp, og status er pr. no ikkje kjend.  Dei andre fullførte økta i høveleg stil.

Ver og føre:  Ukjent..

————————-

18.07.2011:

Ein flott sommardag på Førde Stadion.  Desse fekk seg ei god økt:  Ivar, Jan og Johnny.

Slik var økta:  800m-600m-400m-200m.  Pause 400m gang (ca. 5 min).  Det var Ivar som tok første draget etter å ha lege eit stykke bak Johnny i starten.   På dei 2 neste kom Johnny først til mål med Ivar like bak.  Så på siste draget fann Jan ut at også han skulle vere første.  Tidene på førstemann:  2.30-1.53-69,5-30,3.   Ei verkeleg god økt som nok godgjer seg  i skrotten heile kvelden.

Ver og føre:  Sol ca. 23 grader og vindstille.  Kan ikkje bli betre!!!

———————————–

25.07.2011:

Siste økta i juli – snart er det alvor…  I dag var det dei same tre som var i Hyen sist onsdag:  Ivar, Jan og Johnny.

Menyen i dag var tempointervall.  8x300m (Pause 2min).  Farten varierte mellom 51.7 og 53.4.  Snitt 52.6.  Det er godkjent.  På dei 4 første var det ganske jevnt, men etterkvart var det Johnny som viste størst styrke.  På siste draget var Ivar nær igjen.

Ver og føre:  Regn, vindstille og ca. 18 grader.  Trass regnet var det ok på stadion i dag.

———————-

01.08.2011:

Få på plass i dag då kun Kjell og Jan møtte.  Sjefstrenaren slit med ein kranglete legg, så han bidrog kun som «programmèrar»..

Økta var slik:  Kjell:  2 x 600m – Jan 2 x 400m med 400m gangpause.  Farten skulle vere oppmot max, så dette skulle kjennast.  Jan åpna med 69 der Kjell fortsette kom inn på 1.42 på sin 600m.  Neste runde blei 67 og 1.46.  Gode tider dette.

Ver og føre:  Sommar og sol.  Varmt og godt på stadion.

———————–

08.08.2011:

Ein merkedag for oss i dag:  Vidar Prest stilte til baneøkta!!!  Kjekt for oss – og eg veit – veldig kjekt for han.  Her luktar det comeback som baneløpar – om ikkje i år så neste år…  Utanom Vidar var desse på plass:  Jan, Kjell N, Oddvin og Sverre.

Sverre køyrde eige opplegg med starttrening medan dei andre tok ein klassikar:  4 x 400m med 400m gangpause.  Her vart det jamnt og tøft kjør.  Kjell og Jan var først på nr.1 med Vidar like bak.  Dei to neste var Vidar først og så kom Kjell tilbake.  Tidene låg mellom 67 og 70.  Det må vere godkjent.

Ver og føre:  Overskya ca. 18 grader og vindstille.  Flott!

———————–

15.08.2011:

Det nærmar seg NM og fråfallet i rekkene er markant.  Det er no klart at verken Sverre eller Reidar kan stille grunna skade og liknande.  Oddvin har også trekt seg – då grunna formsvikt (etter eige utsagn).  Dermed vert vi nok kun 3 som reiser.

I dag var desse på stadion:  Jan, Johnny og Oddvin.    Johnny er tilbake etter 2,5 veker med leggproblemer.  Heldigvis gjekk det greitt på første fartsøkta i dag, men her er mykje «rust» i maskinèriet.  Men, det er endå 3 hardøkter igjen før NM , så det må gå.

Økta i dag var kort og hard:  1 x 600m + 1 x 400m.  Pause var ca. 6 min.  Johnny tok første draget.  Tida var 1.43.0  Jan var nokre sekund bak.  På neste draget vart det omvendt:  Jan 63,9  Johnny 64,5.  LEgg merke til at Jan sette årsbeste på 400m med god margin.  Oddvin køyrde eige opplegg med 200m intervallar.

Ver og føre:  Vindstille, lett regn og 16 grader.  Heilt ok på Førde Stadion.

———————–

23.08.2011:

Siste økta før sommarens store mål – Veteran-NM.  Som før sagt blir vi kun 3 stk. som reiser til Drammen i år, og det var desse som hadde siste test på Førde Stadion i dag.

Test ja:  Kjell og Johnny sprang 600m , medan Jan stoppa på 400.  Dermed hadde Jan ansvar som hare, noko han skjøtta på beste vis.  Han fekk ein fin ny årsbeste med 62.5.  Dei to andre passerte på ca. 64 med Johnny først.  Kjell pressa hardt på oppløpssida, men måtte som i fjor sjå Johnny meteren føre seg.  Tidene var betre enn i fjor:  1.39.5 og 1.40.0.  Det lovar bra og alle ser no veldig fram til helga.

Ver og føre:  Ca. 18 grader – lett vind frå sørvest og flotte forhold.

Med det er sommarens jobb overstått.  Takk til alle som har vore med!   Håpar fleire vert med neste år.