Gubbe-blogg

05.01.2011:

Så er avdelinga for midtveke-løparar starta oppatt.  Vi har no flytta økta til torsdagane og frammøtet er som før ved Gjesthalla kl. 19:30.  Frmmøtet har vore spinkelt før i vinter og det var det i dag også.   Ivar og Johnny var dei einaste som møtte tidsnok, men Magne kom også ein halvtime seinare og tok seg ein langtur på 10km ,  Det skal han få for!

Dei to førstnemnde tok kursen ut i Bjørkelia.  Der gjekk det rykte om at fleire gubbar var i sving – då i skiløypa.  Økta for løparane var hard nok den:  6 x 2min motbakke med 1 min pause.  Farten var bevisst rolegare, men tungt gjekk det likevel.  Ivar var godt føre, men var grei nok til å rusle nedatt til Johnny for ny start.

Ver og føre:  Ca – 4 grader og vindstille.  Snøføre og litt glatt, men alt i alt ok.

———————-

13.01.2011:

Spinkelt frammøte igjen.  Magne kom og fann ingen andre.  5 min seinare kom Ivar og fann heller ingen andre.  Dermed køyrde desse herrer sitt eige løp.  Ivar sprang 6 bakkedrag i Gjesdalsvegen Aust, medan Magne sprang ein 8 km tur innover sørsida.

Ver og føre:  Ca. 6 minusgrader og fint ver.  Føret er litt vanskeleg for tida med puddersnø og ujamnt underlag.

——————

20.01.2011:

I dag var det kun Magne som var løpar.  Det vert derimot rapportert om at mange gubbar var å sjå i lysløypa denne kvelden.

Magne køyrde fartsleik over 8km der han spring 250m hurtig og 250 roleg innover sørsida.

—————-

27.01.2011:

Frammøtet steig med fleire 100-prosent då her var 3 stk. på plass:  Asbjørn, Ivar og Johnny

Treninga:  Veldig vanskele føre i kveld, men likevel kom karane gjennom økta på 6 x 1000m.  Det gjekk roleg føre seg og Ivar var som venta langt føre.  Når det heile vel var over, var alle glade for å ikkje har ramla på rattata og brote eit eller anna.

Ver og føre:  Ca. -4 grader, glatt og vanskeleg.  Verste føret denne vinteren.

————————

03.02.2011:

Det er regn på is og livsfarleg føre.  Gutane som trena, trena i dag inne.

————————

10.02.2011:

Vinteren tærer på motivasjonen til løparane ser det ut til.  I dag var det kun «Brothers Solheimsnes» som møtte til økta.

Det blei motbakkeløp i Bjørkelia som vart økta.  4 x 2 min m. 1 min pause.  Det var glatt og det var tungt, men vi kom no igjennom.  Karane heldt kvarandre med selskap overover svingane.

Ver og føre:  Føret er brukbart, men farleg glatt der plogmeiane har gått.  Det fekk Magne erfare, der han brått låg på rygg…  Ca. 2 minusgrader og fint ver.

————————-

17.02.2011:

Årsmøte i Jølster IL i kveld, så fleire aktuelle kanditatar var nok der.  På treninga stillte i kveld Asbjørn og Ivar.

Økta vart 6 x 300m motbakkedrag i Austre Gjesdalsveg.  Rapportane seier ikkje noko om stillinga, men vi vil tru at Ivar ikkje var meir trua enn han pleier.

Det var ca. 5 minusgrader og fint ver.  Føret var betre enn på lenge.

—————————–

24.02.2011:

Det foregår på fleire arenaer desse torsdagkveldane.  Av springarane var det i dag Ivar og Magne som møtte.  I Bjørkelia har det desse kveldane vore ein gjeng som har drive alternativt med gang og ski.  I kveld var det Rune, Roald og Johnny som møtte her.  Roald hadde nemleg terminfesta gubbemeisterskap i langrenn.

Ivar og Magne la opp til bakkeintervall ved Halvard Flatabø.  6 drag à 300m.  Rapportane seier at det var småglatt, men elles greitt.  I skiløypa var det Rune som var best.  Han skøyta.  Johnny vart nr. 2 og Roald nr.3.  Begge her i klassisk stil.  Distansen var 5km.

Ver og føre:  vi har brått fått mildver.  I kveld var det lett regn men likevel fint å vere ute.

—————————

03.03.2011:

Endeleg ein kveld for løparar.  Det var for første gong i vinter tøya på sørsida!  Det var også «rekordframmøte» då både Asbjørn, Ivar, Johnny og Magne møtte.

Det var kjekt å legge i veg innover sørsida utan å måtte tenke på at her kunne vere glatt og ujamnt.  Økta var 8 x 500m med start ca. kvart 3. minutt.  Ivar var godt føre resten – nærmare bestemt ca. 10 sek.  Han starta med fart like under 1.50, men endå etterkvart opp med tider under 1.40.  Avstanden bakover var konstant.  Asbjørn verkar sterk, då han er like i hælane på br. Solheimsnes.

ver og føre:  Ca. + 2 grader og vindstille.  Flott å springe!

————————

10.03.2011:

Nok ein gong var vi 4 stk. og det var dei same som møtte sist.  Her er plass til fleire…

Vinteren er tilbake og det røyner på motivasjonen for ein løpar dette veret.  Men, her er berre å bite tennene i hop og halde det gåande.  I kveld vart det ei god økt.  6 x 1000m intervall.  Pausane  var 1-1.5 min.  Ein køyrde ikkje max – og det var heller ikkje meininga.  Ivar var ca. 100m føre dei andre 3 som heldt seg nokolunde samla.  Tidene til Ivar var mellom 3.40 og 3.50.  Dei andre hadde mellom 4.10-4.15.  Dette gjorde godt!

Ver og føre:  Som sagt det er full vinter igjen.  Snø- og isføre og litt krevande å springe.  Temperatur -2 grader og opphaldsver.

——————————

17.03.2011:

Kun 2 mann møtte i dag.  Ivar og Magne.

Det var Indre Gjesdalsveg som var plassen – denne gongen med skikkeleg feste.  Det tende tydelegvis Ivar for han køyrde så hardt at han måtte melde pass på 6. og siste draget.

Som sagt det var berr veg.  Du verden det var godt!

———————-

24.03.2011:

Tilbake til 4 stk. og dei «vanlege»: Asbjørn, Ivar, Johnny og Magne.

Etter ein ganske roleg tur innover sørsida, skulle her springast 3000m hurtig langtur.    Litt mørkt var det og Ivar hadde ikkje klokke, men sånn omtrent var tidene:  Ivar 11.10, Magne, 12.45 og Asbjørn, 13.35.  Johnny stoppa etter 2500m med hald, og låg då likt med Magne.  Slike økter treng vi meir av.

Ver og føre:  Det var ein sur kveld.  Ca. -2 grader og småglatt.  Sur trekk i mot, så absolutt ikkje dagen for dei store tidene.

—————————-

31.03.2011:

Siste dagen i mars og i dag kjende vi eit snev av våren.  Den vanlege «Gang of four» (Asbjørn, Ivar, Johnny og Magne) var på plass.

Ei ny økt med hurtig (for Ivar i allefall) langtur.  5km var disansen og Ivar sprang greitt igjennom på 18.36.  Dei tre andre kom likt i mål på 22.40 utan å ha teke ut alt.

Ver og føre var upåklageleg.  Ca. + 4 grader grått med opphald.  Snø- og isfritt.

———————

07.04.2011:

Ein sur (vår)kveld vart det nærast rekord-oppmøte:  Asbjørn, Dag, Erlend, Ivar og Magne.

Det vart sprunge pyramide-intervall:  200-400-600-500-400-200.   Ivar var som venta først, men Erlend hadde spart ein del til slutten og pressa Ivar skikkeleg der.  God økt…

Ver og føre:  Ca 3 + grader og silregn.  Sur kveld!

———————–

14.04.2011:

Det vil seg liksom ikkje – dette vårveret.. I dag var det igjen ein heller sur kveld.  Frammøtet var bra då 2 stk. Lien og 2 stk. Solheimsnes stillte på.

Stafettsesongen nærmar seg og vi må få opp farten.  I dag vart det difor ei økt med litt meir mjølkesyre enn vanleg.  4 x 500m med 400m gangpause.  Johnny var først med desse tidene: 1.35-1.33-1.32-1.34.  Magne og Erlend var ganske så like på dei 3 første (1.40-1.42), medan Dag, som er under opptrening etter operasjonen sprang 100m kortare på kvart drag.

Ver og føre:  + 3 grader.  Vindstille og lett regn.