Gubbe-blogg

05.01.2023:
Då er vi «tilbake i salen» og klar til nye økter med mål om å «avgrense forfallet» 🙂 I dag kom det 7 stk. Det var desse: Atle, Jens Ole, Johnny, KjellØ, Magne Geir, Reidar og Torbjørn.

Igjen var vi tilbake i gangtunnelen gjennom Kletten. Ein flott plass når det er surt og glatt ute. Vi gjennomførte 10 drag à ca. 410m. Dette er gode økter som gjer at vi kan halde tempo og steget oppe gjennom heile vinteren. I dag såg vi ei tetgruppe på 3 stk: Kjell og Jens Ole var i tet heile vegen, med Torbjørn i hælane. Resten av gjengen låg forholdsvis samla ca. 20m bak desse. Tidene i tet låg i underkant av 1.50 vestover og noko raskare austover. Det såg ut dei fleste hadde klart å halde formen sånn nokolunde vedlike gjennom høgtida. Frå no og framover går det oppover 🙂

Ver og føre: Ute var det -2 grader, sur vind frå aust og lett snødrev.

***********************
12.01.2023:
Ein gubbe meir enn sist møtte i dag, så då var vi åtte. Kjekt å sjå KjellN tilbake etter langt fråvær. Her er alle: Atle, Jens Ole, Johnny, KjellN, KjellØ, Magne Geir, Odd og Reidar.

Flotte forhold i dag og vi kunne nok ha vore på stadion og om vi ville. Men, vi enda opp i gangtunnelen igjen. Her sprang vi 2x10x180m intervall i svak stigning. Det skulle bli ei god økt der ein får opp steget og farten. Det var forholdsvis tett i feltet der fleire delte på førsteplassane.

Ver og føre: Flott ver i dag, ca +5 grader og vindstille.

———————–
19.01.2023:
Åtte mann på plass i dag og, stort sett med eitt unntak: Geir Øygard æra oss med eit besøk! Her er alle mann alle: GeirØ, Jens Ole, Johnny, KJellN, KjellØ, Magne Geir, Reidar og Torbjørn.

Nok ein gong var vi «innandørs» dvs. Klettentunnelen. Det vart same økta som vi hadde for 14 dagar sidan, 10x400m intervall. Pause som vanleg 1 min. GeirØ, synte seg å ha pleia formen godt. Han tok likegodt teten og der vart han liggande på alle «motbakkedraga». På returen jogga han roleg tilbake mtp diverse plager i musklar og ledd han ikkje ynskjer tilbake. KjellØ og Torbjørn var dei som låg nærmast oppover, og dei som var først nedover. Men, det er ikkje så store avstandane ned til dei andre, og det er jo kjekt.

Ver og føre: -7 grader i Førde i dag, men inne i tunnelen var det «lunare». Ein fin dag!

———————————-
26.01.2023:
No «snakkar vi»!!! Årsbeste når det gjeld frammøtet i dag: 12 stk. Ein kar vi ikkje har sett på lenge, Norvald Hegrenes, møtte også. Det er bra. Eg listar opp: GeirN, GeirØ, Jens Ole, Johnny, Jørund, KjellN, KjellØ, Magne Geir, Norvald, Odd, Reidar og Torbjørn.

Vi held fortsatt til i gangtunnelen, og i dag var det fart i gjengen: 2seriar à 11x200m. Ingen pause, vi jogga rett tilbake til start og så på`an igjen. Seriepause var 3min. Her var mange som ville ligge langt framme, og nesten alle var i tetgruppa ein eller annan gong. Det er jo strålande! Vi har tru på at det vi gjer no vil vise igjen når vi er tilbake på bane og landeveg. Ei kjekk økt vart det.

Ver og føre: Føre er alltid bra i tunnelen, og ute var det også ganske så fint. Ca. 0 grader og vindstille.

————————————
02.02.2023:
Då er vi runda inn i februar, og for ein fin dag vi hadde. Det er mykje slags «sykjer» ut og går, så nokre slit med det. Likevel det møtte 8 stk. dag. Kjekt at Osmund Hjelle dukka opp etter lang tid vekke.
Her er namna: GeirØ, Johnny, KjellN, Magne Geir, Norvald, Odd, Osmund og Reidar.

Det var farleg glatt ute, så då var tunnelen god å ha. Vi køyrde ei «vanleg» økt med 10 intervallar på ca. 400m fram og tilbake. Odd introduserte eit nytt nivå her, då han trykte til noko voldsomt med tider mellom 1.37 ned til under 1.30 på siste. Ei årska var at han valgte å jogge tilbake grunna ei litt «kranglete» hofte. Det same gjorde GeirØ og Osmund. Den som klarte å halde følgje best var Geir, men også Norvald synte musklar og låg langt framme inntil litt knetrøbbel gjorde at han måtte stå av etter 6 drag.

Ver og føre: Ein fin vinterdag ute med -2 gr klårt og svak vind frå aust.

————————————-
09.02.2023:
I dag var det 8 stk på plass. Då referenten ikkje var ein av dei, blir det antatt desse var: Atle, Jens Ole, KjellN, KjellØ, Magne Geir, Odd, Osmund og Reidar.

I gangtunnelen vart det sprunge kortintervall i motbakke med joggepause tilbake.

————————————-
16.02.2023:
I dag var vi heile 9 stk. Her er dei: Atle, Jens Ole, Johnny, KjellN, KjellØ, Magne Geir, Norvald, Osmund og Torbjørn,

Nok ein gang var vi i gangtunnelen. 12x400m med litt over 1min pause. I og med at Odd var vekke, var det ledig i front. Der danna deg seg etterkvart ein trio beståande av KjellØ, Torbjørn og Jens Ole. Dvs Norvald var med på dei første, men fekk trøbbel med eit kne, så han måtte roe ned. Bak desse låg det ein ny gjeng med Atle, Johnny og Magne Geir. Etter ein høveleg start på 1.53 gjekk det raskare i motbakkane, der ein enda opp med 1.42. På returen går det sjølvsagt fortare, og den siste på 1.22 (!).

Ver og føre i dag: Ca. 5 grader, lett regn og vindstille. Er det våren vi anar?

————————————–
23.02.2023:
Ja, vi drive på og som i heile vinter vart det Kletten-tunnelen i dag også. 8 stk. på plass: Johnny, KjellN, KjellØ, Magne Geir, Norvald, Odd, Osmund og Torbjørn.

Som for 14 dagar sidan var det «spintøkta» som vart gjennomført. Dvs. 10x ca. 180m x 2 seriar. Jogg tilbake på kvart drag og så rett på igjen. Med Odd på plass er 1.plassen på ein møte opptatt. Men, det var fleire i feltet som «yppa seg» både ein og to gonger. Vi såg både Torbjørn og Norvald der i tllegg til Osmund. Men, stort sett ligg flokken godt samla, og vi synes det går fort (!!??)

Ute var det sur vint, lett snødrev og ca. 0 grader.

————————————
02.03.2023:
Sanneleg i dag var forholda slik at vi ta økta på Førde Stadion. Litt spinkelt i rekkene med berre 4 stk. på plass. Det var KjellØ, Odd, Osmund og Torbjørn.

Ei solid økt vart det med 6x1000m med pause på 1min. Odd var som venta sjef med fart på ca. 3.45. Kjell var ikkje så langt bak. Deretter fann vi Torbjørn med fart rundt 4.05.

Ver og føre: Fint, lettskya og ca. 0 grader. Kjekt å vere tilbake på tartanen.

———————————–
09.03.2023:
Kong Vinter har teke tak igjen og vi er nede i 2-sifra minustal på natta. I dag møtte 7 stk. Det var Atle, Johnny, Jørund, KJellØ, Magne Geir, Osmund og Torbjørn.

Ja, då var det tilbake i tunnelen og økta med 12x400m intervall fram og tilbake. Jørund er tilbake etter treningsleir i syden, og det har virka såg vi. Han var først heile vegen, men Kjell var hakk i hæl. Torbjørn var nr.3 og køyre raskare og raskare drag utover økta. Det blir rapportert om desse tidene i motbakken: 1.51-1.47-1.44-1.42-1.42-1.35. Tilbake går det som vanleg raskare med bestetid på 1.25.
Alle kom vel igjennom økta, og vi har trua på at vi nok ein gong har lagt økt i banken vi skal hauste av når sesongen startar.

Ver og føre: Føret er som vanleg prima inne. Ute var det sol, vindstille og ca. -4 grader. Ein fin kald vinterdag.

————————————–
16.03.2023:
På ein sur dag søkte vi nok ein gong inn i tunnelen. Vi – det var desse: Jens Ole, Johnny, Jørund, KjellN, Magne Geir, Osmund og Torbjørn.

Det var «spring-serien» som vart sprunge i dag. Dvs. 2x10x180m. Jogg tilbake, så rett på uten pause. Då vi mangla to av frontløparane, var det meir åpent om kven som skulle ta føringa. Vel, eigentleg var Jørund forventa å vere den beste, og det var han på dei fleste. Men, både Osmund, Torbjørn, Jens Ole og Johnny var i tet på enkelte drag. Ei frisk økt dette, som vi trur vil vise igjen når vi kjem ut i dagslys til våren.

Ver og føre: Ute var det sur austavind, snø i lufta og småglatt.

—————————————-
23.03.2023:
Då veit du var vi tilbake på Førde Stadion, truleg for å vere her lenge… Dei som fekk vere med på dette var: Atle, Jens Ole, Johnny, Jørund, KjellN, Magne Geir, Odd, Osmund, Reidar og Torbjørn. 10 stk. ser du… Fleire har vore ned for teljing med «sykje» siste månadane. Sist ut har vore Odd og KjellØ. Vi får tru vi er ferdig med dette no.

VI starta med ein klassikar: 8x500m med start kvart 3.min. Jørund, som syner gode takter, var først heile vegen. Men, Odd lurer like bak, og truar nok plassen når han har fått nokre økter til i beina. Torbjørn var nr.3 heile vegen, med resten av flokken i hælane. Første drag gjekk på ca. 1.52, så gjekk det nedover og enda på 1.40 på siste drag. Det er jo bra.

Ver og føre: Det regna, men temperaturen var nesten oppe i 2-sifra, så det var ikkje så ille likevel. Jau, no kjem våren.

—————————————-
30.03.2023:
Siste runde før påske, og igjen var frammmøtet godt. Desse såg vi på Førde Stadion: Jens Ole, Johnny, Jørund, KjellN, KjellØ, Magne Geir, Odd, Osmund, Reidar og Torbjørn. Altså 10 stk.

Ja, vi fekk litt vinter igjen, så det var litt usikkerheit om det kunne trenast på Førde Stadion. Det var på hekta, der søndre sving var snølagt. Den løyste vi fint med å spring 300m intervallar på dei «gode» strekka. 15 stk blei det, og med småjogg og gange i svingen vart vel pausane godt minuttet. Men, når det går i terskel-fart går det greitt. Tempo starta høveleg med 65, men så gjekk det raskare etterkvart. Snittet var vel rett over 60, men det skal nemnast at siste gjekk på 55! Odd og Jørund duellerte i tet, med KjellØ like bak. Så kom ei gruppe med Jens Ole, Johnny og av og til Osmund.

Ver og føre: ca. +6 grader, overskya og vindstille. Som sagt litt snø på bana.

——————————————-
13.04.2023:
Vel overstått påske! Då var vi tilbake, tilsynelatande utan skadar og mèn. Vi var heile 10 stk. i dag og fleire av desse har vi ikkje sett på lenge: Det var desse: Atle, Geir, Jens Ole, Johnny, Jørund, KjellØ, Osmund, Reidar, Svein og Torbjørn.

Det var kraftig vind frå aust, men brydde vi oss ikkje om. 8x500m (start kvart 3.min) var økta. Jørund drog det heile i gang, men KjellØ tett i rygg. Etterkvart kom Geir sigande og tok over teten på dei 3 siste. Tidene der framme var omtrent sånn: 1.49-1.48-1.46-1.46-1.44-1.44-1.42-1.41. For Jørund, Jens Ole og Torbjørn ville ha 2-sifra og sprang ekstra (!)

Ver og føre: Våren er her med 13-14 grader. Det var vind frå aust, men elles heilt flott å vere på stadion.

—————————————-
19.04.2023:
Då er sommaren komen også.. Og i dag var det nesten folksomt på Førde Stadion med 11 stk på plass. Her er dei: Alexander, Arthur, Frida, Geir, Johnny, KjellN, KjellØ, Magne Geir, Odd, Osmund og Svein.

6x1000m var økta, iallefall for dei «tøffaste». Som vanleg litt over minuttet pause. Det danna seg fort ein duo med Odd og Geir. Starta på 3.48, og så gjekk det raskare etterkvart med 3.40. Odd hadde då fått ei god luke og var ikkje trua. KjellØ låg kontrollert på 3.plass med tider på 3.50-talet. Elles hevdar Frida seg bra og er ikkje langt bak faren.

Ver og føre: Dette er berre perfekt. Sol, vindstille og 18-19grader. Fleire i shorts, og dei som ikkje hadde det angra…Kjekt!

———————————-
27.04.2023:
Det vart trena, men referenten har ikkje tatt rede på kven og kva.

———————————-
04.05.2023:
Ja, då har vi sett det også: 16 stk. møtte til dagens trening, og endå mangla 2-3 av dei faste. Dette er veldig kjekt 🙂 Her er namna på dei referenten kjenner: Alexander, Arthur, Atle, Frida, Jens Ole, Johnny, KjellN, KjellØ, Magne Geir, Odd, Ola, Reidar, Sveinung Lien(ny), VegardH og Vegard Ovrid(ny). I tillegg var det ein kar til.

Ei god økt vart det og den såg slik ut: 10x300m x 2. Pause 1-1,5min (100m gang/jogg). Ola, som årsdebuterte på bana, tok teten med Alex like bak. Etterkvart bytte dei plass, og etterkvart var VegardH nr. nr. Men når farten vart skrudd endå meir opp var Alex åleine i tet. Ein starta høveleg på 65-fart. SÅ gjekk det gradvis raskare og på dei 4-5 siste var ein langt ned på 50-talet. Bak her fann vi stort sett KjellØ, Odd, Johnny m.fl.

Ver og føre: Sol, ca. 11-12 grader og lett vind frå aust. Veldig bra!

**********************************************************************
HAUSTSEMESTERET:

Det vart lite med referat frå slutten av vårsesongen, og når no haust-semesteret blir trakka i gang, er det planen for referenten at dette skal bli meir på stell. Vi startar no!

10.08.2023:
Det har vore folk frå vår gjeng på stadion alle torsdagane i heile sommar. På det minste ein mann (!). Men, i dag var talet høgre enn på ei stund – 7 stk. Det var desse: Det var desse: Atle, Arthus, Johnny, KJellØ, Ola, Per Eivind og Torbjørn. Per Eivind?? Kven er det? Det er ein ny mann i vår gjeng med Gurvin som etternamn. Det syner seg at dette er ein kar i svært god form, og har heva nivået i gruppa endå meir. Velkommen!

Økta i dag var ei klassisk terskeløkt: 10x400m med 1 min pause. Det var Per Eivind som var i tet, men Ola syner at han har pleia forma i sommar og var i hælane eller på sida. Dei starta i 78-fart, men det gjekk raskare på siste draget var heilt nede på 71! KjellØ hadde hand om 3.plassen og Johnny var deretter. Dei ivrigaste tok så 4x200m som «dessert» til slutt. Kjekt!

Ver og føre: Ca. 14 grader, vindstille og overskya. Flott løpsver.

———————————————
17.08.2023:
Ja, sommaren er over og folket vender sakte men sikkert tilbake. I dag kom heile 8 stk. sjølv om vi veit at fleire ligg til lading mot helgas KM. Dei som var her var desse: Arthur, Atle, KjellØ, Magne Geir, Jens Ole, Ola, Svein og Torbjørn.

Økta var slik: 5x800m + 2x400m + 2x200m. Det skulle vere terskel-trening så pausane var berre 1 min. Etter det referenten forstår var Ola langt framme, men både Jens Ole, Kjell Ø og fleire synte at dei har røkta kroppen godt i ferien, så avstandane var ikkje så skremmande.

Ver og føre: Sommar i dag. 22 grader sol og lett vind. Heilt supert!

—————————————–
24.08.2023:
Fortsatt flott sommarver, men no går vi straks inn i hausten. Frammøtet er godt: 10 stk. Her er dei heldige: Alexander, Arthur, Geir, KjellØ, Magne Geir, Jens Ole, Odd, Ola, Svein og Torbjørn.

Det er på tide med litt grunntrening igjen, og då passar det med 1000m-intervallar. I dag var det 6 stk, og som vanleg start kvart 5.min. Etter ein høveleg start med ca. 4.00 i tet, gjekk det fortare og fortare, iallefall for nokre. I tet såg vi som venta at Alexander, Odd og Ola opererte. Men, også KjellØ og Jens Ole var på skothald. Etter som det blir fortalt gjekk det som sagt fortare og fortare i tet og siste draget var heilt nede på 3.28 (!).

Ver og føre: Fine forhold og temperatur på ca. 20grader. SUpert!

—————————————–
07.09.2023:
I dag var det eit storvegs frammøte på bana. Heile 16 stk. (trur eg) vart registert. Ei ny dame kom også: Johanne Viken Sandnes. Velkommen til deg! Her er alle: Alexander, Arthur, Atle, Geir, Gyrid, Harald, Johanne, Johnny, KjellØ, Magne Geir, Jens Ole, Odd, Ola, Per Eivind, Svein og Vegard. Den vaksne lesar vil sjå eit nytt namn: Johanne Viken Sandnes. Velkommen!

Det skal vere stor-arrangement på stadion i helga, så rigging av telt og anna pågjekk medan vi «lurte oss rundt» mellom truck, sjauarar og anna. Det blir sprunge 15x300m intervall med 1 min pause, og det frå då første mann kom fram. Og der framme var stort sett Alexander. Etter ein roleg start på ca. 62 gjekk det fortare og fortare, og på slutten var han vel nede på 52-53. Referenten var langt bak, så han er litt usikker på vidare rekkefølge. Men, Ola i starten og etterkvart Odd og Per Eivind var å sjå langt framme.

—————————————–
14.09.2023:
Høsten er kommen og vart ein overgang etter sommarperioden vi har hatt. Men, uansett: Veret stoppar ikkje oss. Og oss var desse: Alexander, Arthur, Atle, Geir, Johnny, KjellØ, Magne Geir, Jens Ole, Jørund, Ola og Sigmund, Torbjørn og Vegard. Det skulle bli 13 det, noko som seiast å vere supert! Eit nytt namn her: Sigmund?? Ja, det er ein ny kar med Fyllingsnes til etternamn. Velkommen til deg.

Sjefstrenaren (??) foreslo pyramide, og då ingen protesterte vart det slik. Menyen såg slik ut: 200-400-600-800-1000-800-600-400-200. Pausar: 1min til og med 600m og 1,5min på dei lengste. I dag var det veldig god strekk i feltet. Alex drog avgarde i kjent stil og var først heile vegen. Det gjekk fort der framme med t.d. ca. 2.40 på 800 meterane og 3.20 på 1000 meteren. Vidare såg vi Ola, Jørund, Geir og KjellØ. Ola var spesielt sprek i dag og auka farten meir og meir, og på siste draga hadde han kontakt med Alex. Dette er ei økt som gjer godt og som vi heilt sikkert kjem til å gjenta.

Ver og føre: ca. 11 grader, lett vind frå søraust og duskregn.

———————————————-
21.09.2023:
Vi driv på, og mange betre enn på lenge… I dag var det 8 mann på plass på Førde Stadion. Kjekt å sjå Odd tilbake, og ikkje minst Norvald Hegrenes, som vi ikkje har sett på lenge. Her er namna på alle: Arthur, KjellØ, Jens Ole, Norvald, Odd, Ola, Torbjørn og Vegard Ø.

Terskel-intervall igjen, og ein gamal klassikar med 12x400m. Nytt denne gongen var pausane var kun 30 sek. Då måtte farten ned. Ola synte nok ein gong god haustform og låg i tet heile vegen. Odd, KjellØ og Torbjørn følgde så. Tidene i tet låg starta på høvelege 95-96 sek. Men det auka som vanleg på etterkvart, og på slutten var ein godt nede på 80-talet. Nokre ville ha «dessert» også og køyrde 4x200m til slutt. Med andre ord: Ei solid økt.

Ver og vind: Etter å ha regna tungt, letta det på ettermiddagen, slik at det vart retteleg så fint når vi trente.

—————————-
28.09.2023:
Aldri ein torsdag utan trening.. Det meinte iallefall 6 stk. dag. Dei heldige var: Atle, KjellØ, Ola, Odd, Torbjørn og VegardH.

Det var i dag den klassiske 6x1000m intervall med start kvart 5.min. Som vanleg, og venta tok Ola og Odd føringa, og slik var det til og med nr.4, då Ola måtte stå av då eit eller anna i lysken slo seg vrangt. Dei starta på ca 4.00 fart men var godt ned på 3.40-talet etterkvart. Elles var Vegard og Torbjørn å finne på plass nr.3 og 4, men ut i økta bytte dei plass. KjellØ køyrde «oppladningsøkt» mtp helgas Stoltzen-løp.

Ver og føre: Det regna som søren, men heldivis var temperaturen god og det var heller ikkje vind. Så då så…

———————————–
05.10.2023:
Vi har runda inn i oktober, og hausten er skikkeleg over oss. I dag møtte mange – dvs 11 stk. Og gledeleg var det å sjå KjellN på plass. Håpar han vert å sjå fast framover. Her er namna på alle: Arthur, Atle, Geir, KjellN, KjellØ, Jens Ole, Johnny, Magne-Geir, Odd, Ola og Torbjørn.

10x500m terskel-intervall var økta i dag. Som vanleg start kvart 3.min. Som venta tok Ola teten, med tre karar forholdsvis nær: Geir, Odd og KJellØ. Slik var det fram til og med nr.8, då Geir fekk fyr på maskina og var først. Vidare såg vi Torbjørn, Jens Ole og Johnny. Tidene i tet: 1.54-1.49-1.49-1.45-1.44-1.43-1.42-1.42-1.41-1.39. Elles konkurrer nokre i gjengen også: Atle skal til Gloppen og springe halvmaraton til helga og Odd skal prøve seg på «Kringla Opp» (sykkel og løp).

Ver og føre: Ein strålande haustdag: Sol, vindstille og ca. 10 grader.

——————————-
12.10.2023:
På ein dag utan regn – iallefall når vi trena kom desse: Frida, Geir, KjellN, KjellØ, Johnny, Magne-Geir, Odd og Torbjørn. Det skulle bli 8 stk. det.

Etter ein lettare diskusjon på startstreken kom vi fram til denne økta: 1-2-3-4-3-2-1 runder. Pause 1-1,5 min. Det synte seg fort at «eliten» var Geir og Odd. Dei fekk ei god luke og fort gjekk det der framme. Det var Geir som var først på dei fleste. Vidare bakover var Øygardx2 godt plassert med Torbjørn like i hælane. Etterkvart kom han forbi.
Tidene i front var slik: 1.33-3.05-4.37-6.02-4.25-2.53-1.28. Som de ser gjekk det fortare «heimatt».

Ver og føre: Etter nokre dagar med solid regn vart det faktisk opphald når vi var på bana. Tempen var ca. 6 grader. Altså ganske så greitt.

———————————–
19.10.2023:
Vi har fått sol og fint ver, men du verden for ein austavind. Om det var vinden eller andre ting vitast ikkje, men oppmøtet i dag var skralt: Kun 4 stk. Det var Geir, Ola, Torbjørn og VegardO.

Fortsatt på Førde Stadion, og det var sprunge 6x400m for dei fleste, medan Vegard tok 10 drag. Det skilte seg ut to gjengar der Ola og Vegard køyrde på i 82-83-fart, medan dei to andre låg rundt 90.

Ver og føre: Som sagt fint ver, men kraftig austavind.

————————————
26.10.2023:
Då har hausten meldt seg såpass sterkt at det var for glatt på stadion. Men, kva gjer vel det når vi har andre stadar å trene? Det var 2-sifra tal frammøtte i dag og dei var: Atle, GeirN, GeirØ, KjellØ, Jens Ole, Johnny, Magne-Geir, Odd, Ola og Torbjørn. GeirØ??? Ja, du las rett. Sjølvaste Geir Øygard! Kjekt å sjå han tilbake etter lang tid med legg-plager. Måtte han sleppe det no.

Det vart motbakke-intervall i Gjelet i dag. 10 x 400m sånn ca. Odd og Ola tok som venta kommandoen, medan vi andre synte respekt og la oss godt bak. SLik var det heilt fram til drag nr.6 då GeirN hadde fått fyr på «maskina». Han vart tøffare og tøffare, og var først både på nr. 7-8 og 9. Men, på siste slo Odd tilbake med ein skikkleg spurt. Torbjørn var tapper og følgde tetgjengen eit stykke på veg, før det var «tomt». Elles var både GeirØ og KjellØ seg sånn ca. midt i feltet.
Tidene i tet var omtrent sånn i øvste del av løypa: 1.53, 1.46, 1.44, 1,43, 1,42, 1.38, 1.35, 1.35, 1.28.

Ver og føre: Flotte forhold med tørr veg, vindstille og sol. Ca. 0 grader vil eg tru.

———————————–
02.11.2023:
Tilbake på stadion i dag, og det i supert ver. I dag var desse på plass: GeirN, GeirØ, KjellØ, Jens Ole, Johnny, Odd, Ola, Torbjørn og VegardO. Det blir nøyaktig 9 stk.

Tilbake på Førde Stadion som sagt. Det var tørt og fint, men ein litt heftig østavind var godt merkbar. Det vart 400m-intervallar i dag og, men no var pausen berre 30 sek, og i dag ville ein springe 15 stk (!). Det starta pent og pynteleg i 96-fart, men som venta vart dette skrudd opp og på den 5. var ein under 90. Det gjekk fortare og fortare og dei siste fire var slik: 84, 85, 82 og 77. Som venta var Odd og Ola i tet i starten, men også som venta kom GeirN oppover etterkvart. Og så har vi ungdommen Vegard som grusa alle på siste draget. Ei susandes økt!

Ver og føre: Ca. 7 grader, klarver og vind frå aust.

—————————————-
09.11.2023:
Nok ei økt på stadion. Her møtte desse: Jens Ole, Magne-Geir, Odd, Ola, Torbjørn, VegardH og VegardO. Det skulle bli 7 stk. det.

Ei ny økt i dag: 800m-intervallar. Dette vart sprunge 8 stk. Pausen var 1min, så vi snakkar om terskel. Det blir fortalt at Odd og Ola var i tet, og at begge Vegard`ane låg nær. Det var sånn at dei i tet starta på ca. 3.12, men som vanleg gjekk det fortare, og etterkvart var ein nesten ned på 2.50.

Ver og føre: Eit par minusgrader, men på stadion var det nokolunde greitt.

—————————————–
16.11.2023:

Rapport kjem seinare

——————————————
23.11.2023:
Ja, det nærmar seg veldig vinter, og i dag kom han. Likevel var det ok å vere på stadion. 9 stk. på plass. Ein av desse var Reidar Eide som ikkje har sett hos oss på ei stund. Velkommen tilbake! Her er alle: Frida, GeirØ, Jens Ole, Johnny, KjellØ, Magne-Geir, Reidar, Torbjørn og VegardO.

15x400m sa sjefstrenaren. Pausane var kun 30 sek, så då måtte ein dosère. Det gjekk fint føre seg i starten og gjengen var forholdsvis gort samla med Johnny og Magne-Geir nokre meter bak. Tidene låg jamnt på dei 10 første med tider på ca. 93-92 der framme. Men etterkvart gjekk det fortare der Torbjørn og til slutt Vegard drog til med tider på 89 og 86, for ikkje å snakke om Vegard sitt siste drag på 78.

Ver og føre: Bana var ok nesten heile vegen, men på slutten vart det så kaldt at det fraus på. Ca. -1 grad og vind frå sørvest elles.

————————————
30.11.2023:
Då er vi snart i julemånaden og kulden ligg framleis tungt over Vestlandet. I dag kom det 10 stk, derav ein debutant: Håvard Korsvoll. Her er namna på alle:
Frida, GeirØ, Jens Ole, Håvard, Johnny, KjellØ, Magne-Geir, Odd, Reidar og VegardO.

For første gong i haust måtte vi under tak – dvs Klettentunnelen. Vi gjennomførte denne økta: 2 seriar med 10 x 170m intervall. Dette gjekk etterkvart bra unna der Vegard var først, men Odd hang godt på. Elles var både GeirØ og andre låg godt framme.

Ver og føre: -10 grader. Vindstille og snøføre. Godt vi har tunnelen.

————————————
07.12.2023:
Då var vi inne i adventstida og no ser det (endeleg) ut til at kulden er i ferd med å sleppe taket. Etter litt «leiting» fann alle vegen til Klettentunnelen, og då var vi 9 stk på plass. Det er var desse herrer: GeirØ, GeirN, Jens Ole, Håvard, Johnny, KjellØ, Magne-Geir, Odd og VegardO.

I dag var dei heile tunnelens lengde vi sprang og det 10 gonger. Pausen var 1 min. Som venta var tet-gjengen Odd, GeirN og etterkvart Vegard. Kjell var «hissig» på unnabakken tilbake og var heilt i tet der, heilt til han fekk kontakt med ein gamal hamstring-sak på siste draget. Det er å håpe at dette er kortvarig. Det var etterkvart god strekk i feltet. På motbakkedraga starta ein høveleg med ca. 1.45, men det gjekk som vanleg fortare etterkvart, og på siste draget var Vegard heilt nede på 1.24. På unnabakken var det snakk om tider rett ner 1.30.

Ver og føre: ca. -6 grader og vindstille. Men, i tunnelen var det som vanleg greit å vere.

————————————
14.12.2023:
Det stundar til joletid, og dette er neste-siste fellesøkt for denne gjengen i år. No skal alle gå i tenkeboksen og vurdere om dei tek ein sesong til 🙂 I dag kom desse: GeirØ, GeirN, Jens Ole, Håvard, Johnny, KjellØ, Magne-Geir. Det skulle bli 7 stk.

I dag var det iallfall godt vi hadde gangtunnelen. Håplaust snøføre ute iallefall. Det var «kortøkta» i dag, dvs ca. 170m intervall vestover med roleg løp tilbake. Vi sprang 2 seriar à 10 stk. Geir var stort sett først, men måtte innimellom dele førsteplassen med både Magne-Geir, Johnny og GeirØ. Det kan elles rapporterast alle kom igjennom utan for mykje «murring» i musklatur og sener.

Ver og føre: Den kalde epoken er over og i dag var det + 1 grad og vanskeleg føre ute. Men, inne var det fint 🙂

———————————–
20.12.2023:
Så var dagen komen for å runde av treningsåret 2024, iallefall for denne gjengen. Det må vel seiast å ha vore eit godt år, men opptil fleire nye fjes å sjå. I dag var frammmøte litt under pari, truleg fordi nokre var ute og handla julegåve til kona 🙂 Dei som var her var iallefall: GeirØ, Jens Ole, KjellØ, Magne-Geir, Torbjørn og VegardO.

Då var det fulllengde-intervallar i tunnelen, dvs ca. 410m kvar veg. Referenten vil tru at Vegard var først, iallefall på dei som går i stigninga. Det blir elles ikkje rapportert om noko spesielle hendingar.

Ver og føre: