Gubbe-blogg

05.01.2019:
Gubbetrimmen lever i best velgåande, det kan dagens frammøte bevise. Vi går no inn i vår 41 sesong! Frammøtet i dag var svært godt då heile 18 stk. var møtt til «avfetting» etter jula… Her er namna: Anders, Asbjørn, ErlingB, Gry, Johnny, KjellS, Leif, Magne, Magnus, Ola, Osmund, Roald, Rune, Sverre, Turid, Torje, ØysteinH og Aase-Britt. Det som er litt nytt er at det held på å etablere seg ei «gå-gruppe». Sverre og Ola var der i tillegg til Turid, men ho var litt «utru» 🙂 og var med løparane på nokre av draga… Uansett er det flott at vi har også denne gjengen på plass, og det er vel fare for at fleire og fleire havnar der etter som åra går…

Treninga: I dag var det flotte forhold for løparar og gangvegen innbydde til fart og «moro»… Ei klassisk gubbeøkt er denne: Intervallar frå Bøafeltet til Jølster Hotell. Distanse er nøyaktig 485m og vi sprang den 6 gonger. (Joggepause tilbake). Det var 16-åring Magnus som var først på dei fleste draga, men på siste draget synte Osmund styrke og vann med ca. 10m. Johnny var som regel nr.3 med Torje, Asbjørn og Gry litt bak han igjen. Tidene låg på ca. 1.55 med siste draget ned mot 1.50. Ei solid økt dette, men som vanleg – det smakar godt etterpå.

Ver og føre: 4+-grader, grått og vindstille. Som sagt: Dette er løparver!

——————–
12.01.2019:
Nok ein gong var 18 stk. på plass. Det vart sprunge 4xca.1000m intervallar under leiing av Rune. Meir utfyllande rapport skal komme.

———————-

19.01.2019:
I dag kom 14 stk. på treninga. Det er glimrande i og med at mange av dei andre hadde truleg hadde teke skia og fjellet i bruk. Det er kjekt å sjå at «gang-gruppa» er stabil og stiller opp. Her er namna: Anders, Asbjørn, ErlingKjell, Gry, Johnny, KjellS, Leif, Magne, OlaH, Roald, Rune, Sverre, Turid og ØysteinH.

Treninga: Snøføre og skikkeleg vinter i dag. Litt småglatt var det men bakken frå Jølvassbu til Øvrebø Hytter var farbar. Draget er 375m langt og vart sprunge 6 gonger. I og med at bakke-spesialistane ikkje var her i dag, måtte Johnny ta ansvar og teten. Gry er tøff og hadde stort sett hand om 2.plassen. Asbjørn, Magne og Leif kom som regel deretter. Dvs. på siste draget kom 82-åringen KjellS med eit superdrag og var heilt der oppe i lag med Magne og Asbjørn. Imponerande! Elles var det god innsats vidare bakover i rekkene.

Ver og føre: Ca. -4 grader, klarver, fullmåne og stille. Flott vinterver!

———————-
26.01.2019:
Ja, i dag fekk vi besøk av Heidi som vi ikkje har sett på ei stund, og vi hadde ein debutant i «gangar-gruppa»: Berny. Dermed kan vi slå fast at den gruppa er komen for å bli. Det var 14 stk her og her er namna: Anders, Berny, ErlingK, Heidi, Johnny, KjellS, Leif, Magne, OlaH, Roald, Rune, Sverre, Turid og ØysteinH.

Treninga: Då det var glatt mange stadar vart det motbakken frå Jølvassbu til Øvrebø Hytter som vart arènaen igjen. Som sist vart det 6 turar opp, og som sist var det Johnny som var først. Magne, Heidi og Leif låg nærast. Alle kom seg vel igjennom utan fall.

Ver og føre: Ca 0-grader og småglatt. Men, det var grusa opp bakken vi sprang, så det var greit nok.

———————–
02.02.2019:
Då er vi runda inn i februar, og vi kan snart hive refleksvesten. Frammøtet held seg framleis godt med 13 stk. på plass. Her har vi namna: Anders, Asbjørn, Dag, ErlingK, Johnny, Jon-Kristoffer, Leif, Magne, Ola, Roald, Rune og Siw og Sverre. Gangarar i dag var vel kun Sverre. Årsdebutant Dag.

Treninga: Det er litt småglatt, men på gangvegen var det nokolunde. Vi starta med 1x500m frå Einehojen til Bøafeltet. Deretter 5x485m opp til hotellet. Jon-Kr. er i rute til ein god sesong og sette resten av gjengen på plass med god margin. Jon-Kr. låg på tider mellom 1.46-1.50. Nærmast var Johnny, men det var ca. 30-40m fram. KjellN hadde hand om 3.plassen – stort sett like bak Johnny. Magne var nr.4 , deretter Asbjørn og Leif. Etter ein roleg tur heimatt var alle klar for helga!

Ver og føre: Ca. 8 minus og vindstille. Småglatt på gangvegen gjorde nok til at tidene ikkje var heilt topp.

—————————
09.02.2019:
Igjen strålande frammøte med 18 stk. på plass. To av desse var debutantar: Far og son Sundal – Runar og Ard Ragnar. Vel møtt til dykk! Her er namna på alle: Anders, Arn Ragnar, Asbjørn, Berny, ErlingB, ErlingKjell, Gry, Jon Kristoffer, KjellN, KjellS, Leif, Magne, Osmund, Roald, Runar, Siv, Sverre og Aase-Britt.

Det var Roald som fekk æra av å vere sjef i dag. Han tok gjengen med innover sørsida til 5x500m intervall. Etter det vi har høyrt var Jon-Kristoffer først med papsen Kjell på 2. plass. Vil tru at også Osmund var nær her…

Ver og føre: Ca. 0 grader. Usikker på føreholda.

—————————
16.02.2019:
Dette er berre heilt fantastisk! Frammøtet går i taket!. Heile 23 stk på plass – noko som er tangering av rekorden vi hadde for 4-5 år sidan. Her var fleire debutantar å ynskje velkommen: Håvard Slåtten: Lokal kar som ikkje fann oss før i dag. Håvard Lothe: Sandanegut og svigerson til sjefstrenaren. Elles var det kjekt å sjå Svanhild tilbake, og det same seier vi til Fredrik og Jan som årsdebuterer. Her er namna på alle: Anders, Asbjørn, Dag, ErlingK, Fredrik, Gry, Heidi, HåvardL, HåvardS, Jan, Jon Kristoffer, Johnny, KjellN, KjellS, Leif, Magne, OlaH, Osmund, Roald, Rune, Svanhild, Sverre og Turid.

Vi er komne så langt ut på året at vi har springelys også innover sørsida av vatnet. Det er kjekt! Sjefstrenaren er truleg starta å tenke på Veteran-NM om 3 veker for det vart kommandert intervallar med litt lengre pausar enn vanleg. Serien var slik: 1000-800-600-400-200m. Pausane var frå 2 til 3 min. Jon Kristoffer ser ut til å gå mot ein god sesong og var suverènt best i tet. Han hadde denne flotte serien: 3.21-2.39-1.58-70-32. Bak han låg begge Håvard`ane og kriga med KjellN i hælane. Johnny var også nær. Fredrik kom også flott opp på 2 av draga. På første draget var desse nesten 100m bak Jon Kr, men ein kom naturleg nok nærmare etterkvart. Lenger bakover har ikkje sjefstrenaren heilt oversikten, men ein trur at alle fekk ein god dose.

Ver og føre: Ca. +4 grader lettskya og svak vind frå aust. Vegen er isfri og god, så dette likar vi løparane.

——————————
23.02.2019:
Ja, då kan vi rapporter om rekord! Jepp, inten mindre beste frammøte i Gubbetrimmens historia ever! Ei forklaring er at det inkludert her var ein samling for seniorlaget til stafettane. Uansett her er namna: Roald, Leif, Rune, Kjell S, Anders, Magnus B. ErlingB, Åse Britt, Dag, Torje, Jan S, Kjell N, Ola, Siv, Jon K. Gry, Osmund, Fredrik S, Erling K, Håvard K, Hallvard K, Øystein S, Sofie, Simen og Sverre.

Eliten for innover sørsida. Dei andre sprang 5x500m på Bakkeslåttene. Trenar var Rune.

——————————-
02.03.2019;
Då er første vårmånaden komen, og vi anar at det går rette vegen. Frammøtet i dag var også godt med 16 stk. på plass. Desse var: Roald, Leif, Rune, Asbjørn, Anders, Magnus B, Magne, Erling B, Dag, Torje, Jan S Osmund, Fredrik. Erling K, Øystein S og Turid. 5 intervallar frå Barneskulen til gravplassen og tilbake. Trenar var igjen Rune. -sifra

————————–
09.03.2019:
To-sifra frammøtetal i dag og: 10 stk. Her er dei: Leif, Rune, Magne, Erling B. Dag Gry, Osmund, Turid, Runar B, Tor Magne. Trenar Rune var sjef i dag og, men referenten er usikker på kva som vart spunge.

——————————–
16.03.2019:
13 stk. kom i dag: Roald, Leif, Kjell S, Asbjørn, Anders, Åse Britt, Dag, Jan S, Kjell N. Ola, Jon K, Fredrik og Sverre.
Økta var denne intervallserien på sørsida: 1000-800-600-400-300-200m Trenar var i dag Roald.

——————————–
30.03.2019:
I dag var det nesten full vinter i Jølster. Desse møtte: Ola, KjellS, Rune, Roald, Kjell N, Jon K, Turid, Gry, Osmund, Asbjørn, Leif, Trond Gjesdal!, Magnus, KjellØ, Finn, Lydia, Fredrik S og Jan S.
Det blir 18 stk. og av desse har vi ein debuant: Trond Gjesdal! Velkommen til deg!
Økta var 5x500m På Bakkeslåttene.

———————————
06.04.2019:
Då var vi komen til april og våren er faktisk komen. Som vanleg dalar frammøtet når det godver, men 12 stk. var likevel innom tavla og fekk seg «kryss». For første gong hadde vi ein på krykker som fekk seg kryss! Jepp det var Sverre – nyleg hofteoperert, men likevel på plass. Rulator er fortsatt ikkje tema 🙂 Her namna på alle: Anders, Asbjørn, Berny (gang), Gry, Gyrid, Johnny, KjellØ, Leif, Osmund, Roald (sykkel), Trond og Sverre.

FOr første gong i år var Golfrunden gjennomført. 5x2min har vi sprunge mange gonger og førstemann kom forbi startpunktet også i dag. Det var KjellØ som var først heile vegen med Osmund som ein god nr.2. Vidare bakover var det meir ymse, der både Gyrid, Trond og Johnny fekk prøve 3.plassen.

Ver og føre: Sol, litt vind frå aust og ca. 10-12 grader let seg høyre. Det er berre ei veke sidan det snødde.

————————————
13.04.2019:
Vi er på veg inn i den stille veka. Det er fint ver og det var KM terrengløp i dag. Det synte igjen på frammøtet. Kun 10 stk: Anders, Asbjørn, Dag, ErlingB, Gry, Johnny, KJellS, Leif, Magne og Rune.

Etter en roleg joggetur nedover langs elva vart det bestemt at det skulle springast intervallar på Bakkeslåttene. Distansen visste seg å vere 420m og vi sprang den 6 gonger. Vi hadde 2 min pause. Johnny måtte vere hare og førar. Gry var nr.2 på alle drag inntil siste då Magne tok ut resten. Elles var både Leif og Asbjørn oppe og kriga om 3.plassen. Tidene i tet var omtrent sånn: 1.32-1.29-1.33-1.29-1.34-1.27.

Ver og føre: Sol og klarver. Ca. 8 grader, men litt sur vind frå aust merkast østover.

—————————————-
20.04.2019:
Det er påskeafta, det er flott ver og dermed er frammøtet ikkje det beste. I dag var vi 7 stk. på plass. Det var Asbjørn, Dag, Jon-Kristoffer, Johnny, KjellN, Leif, Magne, Rune og Øystein.

Det blei ein golfrunde slik: 1-2-3-2-1 min drag. Pausar 1,5-2-2,5-2 min. Øystein kom langer enn nokon på denne økta og var suveren i tet. Jon-Kr hang brukbart med i starten, men måtte sleppe etterkvart. Johnny var nr.3 med Kjel og Magne bak der igjen.

Ver og føre: Flott ver og ca. 15 grader.

—————————————
27.04.2017:
Ein strålande dag og eit strålande oppmøte. Heile 18 stk. på plass – derav 3 debutantar. Desse var Kristoffer Sandal, Mari Solheimsnes og Kjell Otto Gjesdal. Her er namna på alle: Anders, Asbjørn, Dag, Finn, Gry, Jakob, Johnny, Kjell Otto, KjellN, KJellS, KjellØ, Kristoffer, Leif, Lydia, Magne, Mari, Osmund og Roald.

Det er var opptil fleire som skal på Oldenstafett i morgon, så no er sesongen i gang for alvor. Det vart tempo-intervallar på Bakketslåttene av typen 6x400m Pausar 2 min. Dei to yngste i feltet Jakob og Kristoffer (14år) var først. Kristoffer var først på dei fleste, men Jakob kom sterkt på den siste. Tidene låg mellom 1.10 og 1.14. 3.plassen var det KJellØ som hadde. Vidare var Osmund og etterkvart Johnny. Lenger bak er det fleire som viser gryande form.

Ver og føre: 17 grader og lett vind frå aust. Flott å vere løpar no gitt!

———————————–
04.05.2019:
Vi er runda inn i mai og vinteren er (nesten) tilbake. Det var ein heller sur dag som møtte dei 13 som stilte til trening. Det var desse: Anders, Asbjørn, Johnny, Kjell Otto, KjellN, KjellS, KjellØ, Magne, Ola, Osmund, Roald, Øystein og Aase-Britt.

Det er Breimstafett i morgon og 5 frammøtte skal delta der. Difor var planen å ta ei «skånsom» økt… Det vart motbakkedrag ved Flatabø. Vi snakkar om ca. 300m og vi sprang 6 stk. Til slutt ein 300m på flata innover. KjellØ og KjellS var i tet med Johnny som nr.3. Vidare bakover ser vi at Asbjørn held på å komme i form og var langt framme. Det same var Magne.

Ver og føre: Ca. 6 grader, litt snø i lufta og sur vind frå vest. Nei, dette vil vi ha slutt på.

————————————
11.05.2019:
Det er Holmenkollstafett og mange gubbar er der. V55-laget gjorde det strålande med 2.plass i klassen! Desse gubbane var delaktig i dette: Johnny, Vidar, Asbjørn, Jens-Ole, Finn, Osmund, KjellN, Leif, KJellØ, Magne og Dag. Det er så godt som heile laget. Heime var det 4 stk. som møtte og som hadde ei økt i lysløypa med bakkeintervallar. Det var Anders, Roald, Rune og Turid.

————————————
18.05.2019:
Då er vi tilbake i kvardagen etter Oslo-turen. Det var 11 stk. her i dag: Anders, Erling-Kjell, Henning, Gry, Johnny, KJellS, Leif, Magne, Roald, Rune og Øystein.

Intervallar på Bakkeslåttene var økta. Distansane var 2×670-2×520-2x350m. Leif var plutseleg skikkeleg i støtet. Han vann første draget med 20m og var også i tet på siste. Inni mellom desse var det Johnny som var først. Elles kjekt å sjå Henning tilbake etter lang tids fråvær.

Ver og føre: Lettskya, med vind frå aust. Ca. 14 grader. Flott!

————————————–
25.05.2019:

Det går mot sommar, men godveret let vente på seg. Desse var på plass til litt aktivitet i dag. Anders, Asbjørn (sykkel), Gry, Henning, ErlingB, KjellN, KJell Otto, KjellS, Leif, Magne, Ola, Roald, Rune og Siv. 14 stk. skulle det bli.

Det var Roald som var trenar i dag. Han likar seg i lysløypa, og sånn vart det. Det sprang vi «motbakken» vår som er ca. 300m. Tal repetisjonar er uklart, men truleg rundt 5-6 stk. Kjell Otto er nesten ny i gjengen, men syner alt gode takter. Han var først på dei fleste turane opp, om ikkje alle. KjellN, var i hælane.

———————————–
01.06.2019:
Då har vi runda inn i første sommarmånaden. 12 stk. møtte opp i dag. Det var desse: Anders, Asbjørn (sykkel), Gry, Henning, Jan, Johnny, Leif, Magne, Osmund, Rune, Turid og Aase-Britt. 3 damer i dag – det likar vi!

Assisterande sjefstrenar Rune tok kommandoen, då Johnny er delvis og køyrde eige opplegg i Bjørkelia. Då vart det ein «Rune Spesial»: 4x1000m med vending mellom Jølvassbu og Kloppa. Som venta tok Osmund teten med Jan i hælane. Etter 2 drag tok Jan over, for så å måtte gje tilbake 1.plassen til Osmund på siste draget. Henning, Gry og Magne låg i hælane på desse.

Ver og føre: Ca 8 grader, overskya og vindstille. Greit ver å springe i, men litt kjølig synes no vi.

———————————-

HAUSTEN 2019:

24.08.2019:
Då var sommaren over og ein treningshungrig gjeng stod klar ved Garasje Grønfur for å så sitt første kryss. Imponerande mange til å vere tidleg haust – 15 stk. Det var desse: Asbjørn, ErlingB, Heidi, Henning, HåvardL, Johnny, Jon Kristoffer, Kjell Olav, KjellN, KJellS, Leif, Magne, Magnus, Torje og Aase-Britt. Her var det fleire som har vore lenge vekke… Kjekt å sjå dei igjen.

Treninga: Det var ei meir eller mindre standard startøkt: Bakkeløp ved Hallvard Flatabø. 5x300m opp bakken + ein 300m innover Bakkeslåttene til slutt. Det er godt å sjå at ungdommen tek teten. Jon-Kr var først på alle draga. På neste plass var Håvard og etter kvart Magnus som eigde. Elles var Torje og Kjell Olav spreke og hadde dei 2 neste plassane. Då var vi i gang, og no blir det spennande å sjå om vi han halde oppe det gode frammøtet.

Ver og føre: Litt «Indian Summer» i Jølster i dag. Ca. 16 grader og lettskya. Veldig flott å trene.

————————–
31.08.2019:
Då var august 2019 så godt som over. På denne dagen møtte 9 stk. til økta. Det var desse: Asbjørn, ErlingD, Henning, Johnny, Kjell Olav, Leif, Roald, Rune og Turid. Elles kan nemnast at vi hadde representantar på Førde Opp i dag.

Treninga: Semesterets første golfrunde var sprunge i dag. Denne vart delt inn i 4x3min drag. Pausane var 1,5-2 min. Kjell Olav var først på dei 3 første med Johnny og Henning ganske så nær. På siste draget var det Henning som tok sigeren. Elles var det ei god blanding av løparar, gangarar og begge deler bakover i feltet. SLik vil det truleg bli i åra framover 🙂

Ver og føre: Det var forholdsvis varmt (21 grader), lettskya og flott!

————————————

September har vore litt ymse med konkurransar for mange av gubbane – og kjekt er det. 14.sept. vart «Trekktrasèen» arrangert av oss, og 21.sept. reiste vi til Lærdal og «Galdane Rundt». Så til slutt 28.sept var fleire med på «Stoltzekleiven Opp» i Bergen. Nokre har likevel vore på plass kl. 17:00 og fått sitt kryss.

28.09.2019:
Som sagt det var fleire som var opptatt med andre ting. Det var 7 stk. på plass i dag: Det var ErlingB, Johnny(Sykkel), Jon Kristoffer, KjellN, Leif, Roald og Siw.

Treninga: Med Leif som sjefstrenar vart det ein klassisk «Leif-økt». 5x300m bakkeløp ved Flatabø og deretter 2x300m østover. Jon Kr. køyrde eige opplegg, og då var det duka for at faren var sjef for gjengen. Leif hadde 2.plassen. Elles er det ikkje kjent at noko dramatisk skjedde.

Ver og føre: Flott haustver. Vindstille, ca. 15 grader og sol.

————————————-
06.10.2019:
I dag levde vi verkleleg opp til namnet vårt. Yngstemann var 59 år, snittalderen over 65, og då var ikkje eingong eldstemann KjellS med! Dei 11 som var her var: Anders, Dag, ErlingB, ErlingK, Johnny, Kjellaug, Leif, Ola, Roald, Rune og Turid. Kjekt å sjå Dag og Kjellaug tilbake etter langt fråvær.

I dag var kursen lagt mot aust og motbakkeløp i Indre Gjesdal. Ein småskada sjefstrenar hadde tenkt å spare seg, men enda opp med å ligge først. Det gjekk ikkje så fort som før, men det får våge seg. Vi sprang 4 gonger frå botnen og til slutt den lange motbakken opp til toppen. Med unntak av 2 vart alle med opp. Alltid kjekt å jogge nedatt etter denne dosen.

Ver og føre: Fantastisk haustver. Vindstille, 12 grader og sol.

—————————————
12.10.2019:
Etter litt mindre frammøte enn vanleg var vi i dag tilbake med ein flott tal: 14 stk. møtte! Her namna på dei heldige: Asbjørn, Erling Kjell, Dag, Gyrid, Kjellaug, Kjell Otto, KjellS, KjellØ, Leif, Magne, , OlaH, Rune, Torje og Tor Magne.

Ein enda opp ute på Bakkeslåttene og der var det sprunge 8x300m intervallar. Etter rapportane å dømme var det KjellØ og Torje som herja i front.
Utover det er lite kjent, men det er iallefall sikkert at alle kom seg vel heimatt med ei god kjensle i kroppen.

Ver og føre: Fortsatt ok ver. Lettskya og fint.

—————————————
19.10.2019:

No snakkar vi! 21 stk. på plass, og det på ein dag som innbydde til mange andre aktivitetar! Desse var på plass kl. 17:00: Anders, Asbjørn, Dag, ErlingB, Erling Kjell, Fredrik, Gry, Jan, Jon Kristoffer, Kjellaug, Kjell Otto, KjellN, KjellS, KjellØ, Leif, Magne, Osmund, Roald, Rune, Turid og Aase-Britt.

Ass. sjefstrenar Rune hadde bestemt seg for 1000m-intervallar i dag. 4.stk. vart det. Ein var nok ein gong på grusvegen på Bakkeslåttene. Jon Kr. var i tet på dei 3 første, men så kom «gamlefar» KjellØ opp og var først på siste draget. Med ei slik samling løparar var det nok god strekk i feltet, men det er som det skal vere. Alle yter etter evne og kapasitet.

Ver og føre: Nok ein gong ein strålande haustdag i Jølster.

—————————————
26.10.2019:
Igjen strålande frammøte. I dag 20 stk. Anders, Asbjørn, Dag, ErlingB, Erling Kjell, Gyrid, Fredrik, Gry, Jan, Johnny, KjellS, KjellØ, Leif, Magne, Ola, Osmund, Roald, Rune, Tor Magne og Torje.

Sjefstrenaren hadde spekulert ut ei heilt ny økt. Det var motbakkedrag i ulike variantar i Ytre Gjesdalsvegen. 5 drag nede og eit langt drag heilt til topps. Det var ein trio i teten på dei fem første. Det var KjellØ, Gyrid og Jan. På siste draget kom Osmund som ei kule og var først opp.

Ver og føre: ca. 5 grader og overskya. Fint å trene var det!

—————————————
02.11.2019:
Då er vi komne inn i november og det omtrent mørkt når vi møtes. Det stoppar ikkje oss: Igjen eit flott frammøtetal: 16 stk. Det var desse: Dag, Erling Kjell, Gry, Gyrid, Johnny, Kjellaug, KjellS, KjellØ, Leif, Ola, Osmund, Roald, Rune, Torje, Turid og Aase-Britt. Altså 4 damer…. Det likar vi!

Vi tok kursen vestover og enda opp nede på Bakkeslåttene. Her sprang vi bakkeløp frå H.Flatabø. Distansen er 285m og denne sprang vi 5 gonger. Deretter vart det 2x300m austover. Første draget var Gyrid og pappa Kjell først. Men, så kom Torje og tok over på dei 4 neste. Han vart hardt utfordra av Osmund på nr. 5. Vidare bakover var Johnny og Leif, og så kom heile gjengen. På dei 2 siste var «Øygards» først igjen.

Ver og føre: Tempen var 2-3 +-grader, men ein sur austavind gjorde det kaldare enn det. Elles fine forhold.

——————————————————–
09.11.2019:
Fortsatt stødig ver og fortsatt godt frammøte. I dag 19 stk. Det var: Anders, Asbjørn, Dag, ErlingB, Erling Kjell, Gyrid, Fredrik, Frida, Gry, Henning, Johnny, KjellS, KjellØ, Kjell Olav, Kjell Otto, Leif, Magne, Ola, Roald og Torje. Kjekt å sjå Frida tilbake. Ho satsar på langrenn og held til i Trondheim.

I dag tok vi ei økt vi har køyrt mange gongar før: 5x500m frå Bøafeltet til hotellet. Her vart det fleire som ville vere sjef. KjellØ var først oppe på dei 2 første, men så kom Torje og tok dei to neste. Men, så på siste draget var det Gyrid som vann heile greia, og det på kveldens beste tid. Elles bestod, det vi kan kalle tetgruppa av Frida, Kjell-Olav, Johnny og på siste draget kom også Henning fram. Tidene i tet: 1.53-.1.50-1.49-1.48-1.46. Gode greier på denne tid av året. Elles kjekt å sjå denne store flokken på gangvegen!

Ver og føre: 3-4 minusgrader, vindstille og gode forhold elles.

—————————————
16.11.2019:

I dag hadde «elitegjengen» under leiing av Eivind samling på same tid som vi har har vår økt. Det gjorde at det vart eit strålande frammmøte, nesten 30 stk!!!!. Referenten har ikkje namna på alle i elitegjengen, men mellom dei andre gubbane var desse på plass: Anders, Asbjørn, Dag, Eivind, ErlingB, Erling Kjell, Frida, Gyrid, Gry, KjellØ, Kjellaug, Kjell Olav, Leif, Osmund, Roald, Rune, Torje, og Aase-Britt.

Økta var eliten var slik: 10x35sek x 2. Gubbane vart med på 8 stk. og tok så 2 drag på gangvegen innover mot Gjesthalla.

————————————
23.11.2019:

Rapport kjem!

————————————
30.11.2019:
Siste dag i november og i dag var det litt meir vinter enn før, og igjen eit strålande frammmøte. Som for 14 dagar sidan hadde «elitegjengen» samling. Tek vi dei med var i heile 25 «gubbar» til stades i og rundt Vassenden i dag. Her er namna: Anders, Asbjørn, Dag, Eivind, ErlingB, Erling Kjell, Gyrid, Gry, Jon Kristoffer, KjellØ, Kjellaug, Kjell Olav, Kristoffer, Leif, Magne, Osmund, Roald, Torje, Siv og Aase-Britt.

Eliten hadde ei motbakkeøkt opp mot MoJo som var slik: 10x35sek x 2. Korleis det gjekk i den gjengen kjenner ikkje referenten til, men kan fortelje dette om det dei eldste hadde føre seg: Etter oppvarmingsrunden nede til Bøafeltet vart det motbakkedrag på vegen opp Årsetbakkane. Ein distanse på 360m vart sprungen 5 gonger. Det var vanskeleg føre, så farten vart deretter. Det var Torje som var først på alle draga, medan Kjell Olav, Kjell Otto og Osmund kjempa om 2.plassen. Ein merkar seg også at dette er ei økt for Gry, som sette dei fleste karane på plass. Det skal også nemnast at Osmund, Gry og Torje likegodt slengde seg med på dei siste 8 draga med eliten…. Applaus!

Ver og føre: Ca. 0 grader og snøføre. Vanskeleg å få feste i motbakkane.

————————————
07.12.2019:
Då er vi i julemånaden og i dag var det julestemning som berre det. Det var ein sterk gjeng som mønstra i dag. 14 stk. Det var desse: Anders. Asbjørn, Dag, Erling Kjell, Gry, Heidi, Johnny, KjellS, Kjellaug, Leif, Roald, Rune, Turid og Aase-Britt. Kjekt å sjå Heidi tilbake! Og ikkje berre det: I dag var vi heile 5 damar med. 🙂
Men i tillegg til desse hadde også «elitegjengen» ei ny samling med bakkeløp ved Jølvassbu. Dei som var der var: Eivind, Øystein, Håvard, Simen, Åsmund, KjellØ, Hallvard, Magnus, Gyrid, Sofie og Johanne. Det blir 11 stk, så då var totalt 25 stk. i sving!!!

Så litt om økta for dei «vaksne»: Etter ein roleg oppvarmingsrunde ned på Einehojen, hadde sjefstrenaren kome til at det var ganske ok å springe på gangvegen. Då vart økta slik: 2×1000 + 4x500m. Pausar ca. 1,5 min. Planen var å ta det «pent», ja, sjefstrenaren sa at det skulle vere som ein hurtig langtur. Likevel var det no tungt nok likevel. Johnny fekk vere først på alle, men Gry syner styrke og var nr.2 på alle så nær som siste, då Leif tok grep. Vi ser også at Aase-Britt ser ut til å gå mot ein god sesong, og heldt 3. og 4. plassen. Der låg også Asbjørn og vidare Leif…
Tidene i tet var ca slik: 4.30-4.22-2.03-2.08-2.05-2.03.

Ver og føre: Ca. -1 grad, snødrev og vindstille. Snøføre på gangvegen, men likevel ganske ok å springe her.

———————————–
Det har verkeleg svinga av Gubbetrimmen i det siste. Ikkje berre er det solid frammøte i «gamlegjengen», men vi har også hatt gleda av å skimta den nye generasjonen trene sine økter. Dette har gjort at vi har vore opp i neste 30 stk. I dag tok vi økta i lag, og det var 26 stk. på plass! Det er glimrande. Her er forhåpentleg namna på alle: Anders, Asbjørn, Dag, Gry, Hallvard, Johnny, KjellN, KjellØ, KjellS, Kjellaug, Knut (Skurtveit), Leif, Ola, Osmund, Roald, Rune, Siv, Torje, Turid og Aase-Britt. Rekruttane: Jakob Slåtten, Jon Kristoffer Navelsaker, Kristoffer Sandal, Håvard Klakegg, Magnus Reite Bjellås og Øystein Støfring.

På nest sist økta før jul har det etterkvart vorte ein tradisjon at det skal springast 20x200m intervall. Det er ein solid dose, og for mange av dei eldste er det meir snakk om å fullføre uten strekk og skadar, enn at ein skal «gå heilt i kjellaren». Vi fann ut at vegen frå Gjesthalla og vestover skulle brukast. Her var det lite trafikk, trudde vi, men det synte seg å ikkje stemmme.
Heldigvis var det rekruttane som var først. Som regel Øystein Håvard og Kristoffer. Men, dei andre i den gjengen var nær. Det gjekk bra unna med tider mellom 31 og 35 sek. Av veteranane imponerer Torje igjen og «tøffar» seg heilt der framme. Vidare var KjellØ, Hallvard og Johnny. Vi ser også at både Gry og Aase-Britt ligg langt framme.
Alle kom seg igjennom og ingen vart skada. Det er bra!

Ver og føre: Veldig fin dag i Jølster i dag: +2 grader, vindstille og lettskya. Superb!