Gubbe-blogg

09.febr. 2017:
Rekordtidleg var vi på Førde Stadion, og det i glimrande forhold! Det var kjekt å komme igang igjen sjølv det var mykje «rust og rusk» i maskineriet… Geir, Johnny, KjellN og Vidar har vore her før, men i dag hadde vi besøk av ungdommen: Jon-Kristoffer Navelsaker – son til far sin og etterkvart ein habil løpar, trass at han ikkje er fylt 14 år endå. Sistnemnde køyrde eit eige opplegg med tanke på innandørs-konkurranse i helga, men det var godt nok til at ingen av oss andre greidde å følgje han!

Treninga: Ei god startøkt er denne: 1000-800-600-400-200m. (Pausar frå 1,5 – 2min). Geir har pleia formen bra og var ikkje trua i tet. Johnny og KjellN var høveleg nær, medan Vidar har ein lengre veg til godforma. Tidene i tet: 3.45-2.50-2.03-77-36. KjellN måtte stå av etter 3 drag og Johnny etter 4 drag – begge med lår-trøbbel og lår-strekk tendensar. Ja, ja, inten nytt under solen i så måte!! 🙂

Ver og føre: Ein fantastisk «vinter» for løparar. Det var vindstille, tørt og fint og ca. 0 grader.

——
17.08.2017:
Ja, det er lenge sidan sist. Mykje har skjedd og mange skadedagar er unnagjort. I dag prøvde vi oss til igjen. Og vi det var Geir, Johnny og Vidar. Rett før vi skulle sette igang kom Harald Slettvold også, så dermed var «haren» på plass 🙂

Dagens tekst var ei høveleg «startøkt»: 4x1000m. Som vanleg start kvart 5.min. Harald kom etter kort tid opp i tet og der vart han verande. Første draget var Geir med, men sidan auka farten og dermed var vi sakte men sikkert lenger og lenger bak… Tidene i tet: 3.42-3.37-3.32-3.27. Geir låg på ca. 3.40-fart, Johnny rett under 4.00 og Vidar ca. 4.10. Absolutt noko å bygge vidare på!

Ver og føre: Ein flott dag. Ca. 16 grader, lettskya og lite vind.

23.08.2017:
I dag skulle vi få besøk at storløparen Marius Vedvik i samband med eit sponsoropplegg mot Sunnfjord Energi. Dette gjorde at økta var flytta fram 1 dag. No vart det sånn at «kun» Geir og Johnny møtte, og då ingen av dei er frå Sunnfjord Energi, vart det kanskje ikkje så mykje av sponsorjobben. Uansett: Det var kjekt å snakke med Marius, både før og etter økta.

Då Marius skulle spinge sprintøkt vart det til at karane sprang denne serien: 1600-1200-800-400m. (Pause3-2-1min). Geir var som venta først og hadde desse tidene: 6.02-4.21-2.46-74. Johnny var høveleg bak, men var likevel godt nøgd med farten.

Ver og føre: Perfekt! Akkurat som sist

—————————
07.09.2017:
Etter ei vekes avbrot var iallefall to av oss tilbake på stadion. Det var Geir og Johnny. Vidar ladar opp til den store Barcelona-turen, så han har gyldig fråvær!

I dag var det 500m-intervallar. 8 stk. med start kvart 3.min. Geir tok fort teten og der vart han værande. 1.43-1.42 fart i starten medan dei to siste gjekk på 1.40 og 1.39. Johnny låg jamnt i underkant av 1.50-fart. Begge var nøgde med det.

Ver og føre: Ca. 15grader, lettskya og nesten vindstille.

———————-
21.09.2017:
Etter ei vekes avbrot var karane tilbake på bana. I dag møtte Geir, Johnny og KjellN. Sistnemnde var på bane for første gong sidan NM i juni, og det var lite å skrive heim om.
Vi må først gratulere Geir med ein kjempesterk «supermaraton» under Oslo Maraton laurdag: Heil- + Halv-maraton + 10km på ein dag, og nr.11 totalt av alle!!!!

1000m-intervallar er gode saker for dei som vil bli betre, og det vil vi alle… 5 stk i dag, som vanleg start kvart 5.min. Geir måtte greie seg utan dei andre og var suverèn i tet. Tider på rundt 3.40 med ei god avslutning på 3.36 let seg høyre. Johnny hadde hand om 2.plass med Kjell like bak. Dei låg på 3.57.-3.58 fart. Det siste draget stod dei av etter 500m på 1.51.

Ver og føre: Litt vått, men ok temp på ca. 14.grader.

————-
28.09.2017:
To mann på plass i dag: Geir og Johnny. Det var solid austavind og snev av sommar, så då vart det fartsøkt:

10x300m med 100m gangpause=1.5min var dagens meny. Johnny var som vanleg raskast på første 100m, men etterkvart kom Geir sigande opp på sida. Likevel det var korte avstandar på dei 6-7 første, men så auka Geir litt medan det gjekk litt tilbake med Johnny. Tidene låg på 55-56 med siste draget ned på 54. Ei god økt, sjølv om diverse skavankar varsla Johnny om at dette var forholdsvis tøft for kroppen.

Ver og føre: Som sagt solid vind frå aust men du verden for eit ver! ca. 16 grader og sol.

—————-
05.10.2017:
Kun Johnny møtte i dag, men i selskap med «lensmannsgjengen» vart det ei god økt: 2000m-1500m-1000m-500 (Pausar 3-2-2min). Tider 8.17-6.07-4.00-1.51. Godt nøgd med den, og det beste var at alle «alarmane» i hamstring ikkje slo til.

Ver og føre: Så var det haust. Ca. 8 grader, vindstille og litt yr. Ok likevel.

—————–
19.10.2017:
Ein gledens dag for oss i dag: Torbjørn er tilbake! Kjekt å ha guten med på treningane igjen.. Etter det han har vore i gjennom siste månadene, er det imponerande å sjå at gamle takter fortsatt er til stades. Utanom var Geir og Johnny på plass.

Geir skal springe full-maraton i Bergen til helga, så han hadde eigentleg «fri» i dag. Men, for å halde oss med selskap var han med på delar av økta. Og økta var 5x1000m. Som vanleg start kvart 5.min. Johnny og Torbjørn heldt følgje på dei 3 første. Tider ca. sånn 4.02-4.00-3.58. Men så skrudde Torbjørn opp tempo til 3.50 og 3.42, medan Johnny fortsette i sub-4 fart. Ei god økt, og spesielt for Torbjørn var dette uvant kost.

Ver og føre: Ca. 5 grader, vindstille og overskya. Fint treningsver!

—————–
26.10.2017:
I dag var det god plass på stadion. Johnny var her åleine. Dvs. her var 2 yngre damer som sprang 200m-intervallar, så det var no litt å sjå på 🙂

500m intervallar var dagens oppgåve. Det blei med 7 stk. Som vanleg start kvart 3.min. Tidene var i snitt på 1.48-1.49 med 1.47 som beste drag. Godt nøgd med det.

Ver og føre: Ca. 6 grader, vindstille og lettskya. Veldig bra!

—————-
02.11.2017:
Vi er runda inn i november, men du verden for ein flott dag innimellom alle regndagane. I dag var det Geir og Johnny som var på plass. Altså her er god plass.

Langintervallar på denne måten: 2000-1600-1200-800-400 (Pausar ca. 2min). Geir var som venta langt føre og hadde desse tidene: 7.37-5.56-4.26-2.53-75.

Ver og føre: Klarver – vindstille og ca. 4 grader. Flott!

———————

16.11.2017:
I dag var det 20 grader sol og vindstille på stadion.. ??? Nei, det var det dei drøymde om, Geir og Johnny, der dei sprang rundt Førde Stadion i regn og væte.

Dagens økt var 6x1000m – iallefall for Geir. Som vanleg start kvart 5.min. Johnny var med på dei 3 første, og gjekk så ned til 600m på dei 3 siste. Tider i tet: 3.42-3.47-3.47-3.48-3.52-3.47. Det vart ei tung økt, men som vanleg er det då ekstra godt å komme igjennom.

Ver og føre: Ca. 3 grader og striregn. Surt!

———————
30.11.2017:
Etter 1 vekes fråvær var Geir og Johnny på plass på eit stivrima Førde Stadion. Likevel det var heilt ok å springe.

I dag køyrde vi denne serien: 5-4-3-2-1 runder. Pausar 2-2-1,5-1,5min. Det var så kaldt at vi tok det litt rolegare enn vanleg. Geir i tet og Johnny i god avstand. Geir hadde ca. desse tidene: 8.04-6.25-4.40-2.59-77. Johnny var 140-100-80-60-40m bak (!!)

Ver og føre: 7 kaldegrader og vindstille. Likevel betre enn venta.

———————
07.12.17:
Banesesongen er for lengst over, og ver og vind er ikkje på vår sida… Likevel Geir og Johnny møtte likevel opp til ei god økt på Førde Stadion.

I dei voldsomme vindkasta vart det sprunge denne intervall-serien: 10x400m (Pause 1,5min). Det var tettare mellom løparane enn på dei lengre øktene. Geir var først heile tida og låg på tider mellom 86 og 89.

Ver og føre: Kraftig vind får nordaust gjorde at oppløpssida var lengre enn vanleg. Frå -7 gr sist torsdag var det i dag +7 grader. Vestlandet altso….

——————-

21.12.2017:
Det er ganske fantastisk! Her snakkar vi 21.des. og vi opplever topp forhold på Førde Stadion. Geir og Johnny var på plass og for begge var dette rekord når det er snakk om banetreningar seint på året.

I dag vart denne serien med intervallar sprunge: 200-400-600-800-1000-800-600-400-200. Pausar var 100m gang (1,5-2min). Geir var først, og som vanleg vart det lenger og lenger avstand bakover etter som metertalet steig. Her er den flotte serien: 39-83-2.11-2.58-3.45-2.58-2.08-79-34! Det er ei kvass økt, så det kjentes etterpå og godt er det. No tek vi juleferie og møtes igjen første torsdag etter nyttår. Takk for i år!