Gubbe-blogg

3.jan 2019:
Då var vi i gang igjen og alle er einig om at «vi tek ein sesong til!».. I dag var det 4 mann på plass: Geir, KjellN, Torbjørn og Vidar.

Det er Gjelet som gjeld også i år. Då det var ny månad og nytt år, måtte det bli ny meny: Dvs. menyen er lik – berre utvida til 6 intervallar! Ja, ja, sjølv om ovasjonane ikkje var store, har alle trua på at dette skal hjelpe ein fram til godforma ut på våren. «Superharen» vår – Geir – er utilnærmeleg og hadde ein fin serie slik: 3.05-3.02-2.58-2.56-2.56-2.56. Torbjørn held også godt nivå med denne serien: 3.10-3.10-3.08-3.06-3.03-3.00. Så er referenten litt usikker på kva som skjedde lenger bak, men ein forstår at Vidar og Kjell var ganske nær kvarandre, og at Kjell møtte «veggen» på siste draget.

Ver og føre: 3-4 + grader og isfri veg. Flott dette for løparar.

—————————
10.januar 2019:
I dag opplevde vi 2 rekordar… For det første var frammøtet rekordstort då heile 7 stk. møtte til økta. Den andre rekorden kjem lenger nede… Dei 4 faste (Geir, Johnny, Torbjørn og Vidar) var på plass, og KjellN kom også. Men, så kom to nye: Norvald Hegrenes og Geir Øygard! Gode gutter med mange treningstimar i beina! Dermed passar dei godt i lag med oss. Ja, det var nesten trangt på vegen opp Gjelet!

Som sagt: Arèna Gjelet venta på oss, og vi kom og tok 6 turar opp bakken. Om nokon hadde kome i skade for å tru at no var tida komen då ein skulle starte å ta att forspranget til GeirN, vart dagens økt ein nedtur. I dag var karen i slag – sjå på denne serien: 2.58-2.52-2.43(!!(Rekord))-2.55-2.56-2.56. Også Torbjørn hadde årsbeste med denne serien: 3.02-3.00-2.57-3.07-3.06-3.02. Det vart mykje «vatn mellom båtane» og bakover i feltet var det GeirØ som stort sett hadde hand om 3.plassen. Vidar, Norvald og Johnny kom deretter, men det var ikkje alle som kom rundt siste sving før Geir var oppe. KjellN hadde avtale som gjorde at han stod av etter 3 drag.
Som vanleg røynte det på, men det må vel til…

Ver og føre: Omtrent som sist og til å vere januar, er dette berre lekkert!

————————–
17. jan.2019:
Heldigvis såg det ikkje ut til at vi skremde av dei to nykommarane GeirØ og Norvald sist, for dei dukka opp i dag og. Det same gjorde «veteranane» GeirN og Vidar, og ikkje minst 2 stk. Navelsaker Kjell og Jon-Kristoffer. Dermed var ein 6 stk.

I dag var det glatt som bakken opp Gjelet var krevjande. For første gong måtte GeirN spele 2.fiolin, då 15-åringen Jon-Kr synte at formen er stigande. Han var første heile vegen med tider mellom 2.55 og 2.58. Geir var med på dei 2 første, men måtte deretter motvilleg sleppe eit par sekund. Også han hadde alle under 3.00. Vidar og GeirØ låg i lag i starten – ca. 10 sek bak med Norvald og Kjell bak der igjen. GeirØ seig frå Vidar og Norvald etterkvart, medan Kjell ikkje var langt bak. Alle klarte alle drag, og fekk dermed «meget bestått» i karakterboka!

Ver og føre: Litt vrient i dag. Nullføre og glatt, så det var ikkje dagen for dei store tidene.

————————
24. januar 2019:
Det veks i rekkene! I dag var vi 9 stk! Det er jo strålande. Ny her er Jens Ole Årdal, ein gammal «storløpar» – spesielt i unnabakkar! Så dukka også Jørund Hammersvik opp og synte at han held god form. Her er namna: GeirN, GeirØ, Jon-Kristoffer, Jens-Ole, Jørund, Kjell, Norvald, Torbjørn og Vidar.

Jørund tok sjefsrolla, men Jon-Kristoffer følgde han på dei 2 første. Så streika magen og det vart rolegare. Jørund var først på alle og låg rundt 2.50. GeirN og Torbjørn følgde deretter. Dei låg rett rundt 3 min. Vidare var det som regel slik: GeirØ, Jens-Ole, Norvald, Vidar og Kjell.

Ver og føre: Ca. 0 grader og lett snø. Det var «mjølføre» og glatt, så tidene er gode.

——————————-
31.januar 2019:

«Godt det er 31 dagar i januar, så slepp vi å springe 7 drag i dag» var det ein som sa 🙂 Det som også er sikkert er at vi «jobbar» i ei vekstbedrift! I dag var deltakartalet 10 stk. Ny mann er Magne Solheimsnes. Her er namna på alle: GeirN, GeirØ, Jon-Kristoffer, Jens-Ole, Johnny, Kjell, Magne, Norvald, Torbjørn og Vidar.

Igjen var det Gjelet som var arèna. Jon-Kristoffer synte styrke og var først opp på alle. Og alle gjekk på tider mellom 2.50 og 2.55. GeirN låg nær heile vegen og gjorde at begge gav «alt». Torbjørn fullførte full distanse på tider like over 3.00. Så vidare bakover var det eit «salig rot» med omstokkingar i rekkefølgja. Det er vel rett å seie at GeirØ som regel var nr.4, men både Norvald og Vidar «tøffa» seg på enkelte drag. Det som er sikkert er at i baktroppen var Johnny, Kjell og Magne. Som vanleg ei styrkande økt som vi vil ha igjen for når sesongen startar.

Ver og føre: Ca. + 2 grader og sur austavind. Føret opp Gjelet var ganske bra, då det var nygrusa.

———————–
07.02.2019:
Gledeleg å sjå at frammøte held seg høgt. 8 spreke karar møtte i dag: GeirØ, Jon-Kristoffer, Jens-Ole, Johnny, Kjell, Norvald, Torbjørn og Vidar.

Det var litt usikkerheit i feltet om det var noko vits å prøve Gjelet på hålka i dag. Fleire alternativ vart vurderte. Etter ei synfaring vart det bestemt at Gjelet kunne brukast, men det var til dels svært glatt. Jon-Kr. sette standarden og var først på dei 3 første draga. Så vart det tyngre og Torbjørn tok over på dei 3 siste. Tidene i tet låg mellom 3.05 – 3.08. Det vart lagt mellom «båtane» med lengre strekk i feltet enn vanleg. Referenten såg det an til at GeirØ var nr.3 for det meste, elles lite å hente av gode tider, men hjarte og lunger fekk som vanleg køyrt seg.

Ver og føre: Ca. 0 grader, grått og vindstille. Glatt og vanskelegare enn på lenge.

———————-
14.02.2019:
Igjen solid oppmøte med 8 karar på plass. Det var dei same sist altså: GeirØ, Jon-Kristoffer, Jens-Ole, Johnny, Kjell, Norvald, Torbjørn og Vidar.

Endeleg fast grunn under beina! Is og holke var vekk, og vi kunne sette trykk i fråsparka. Nytt nivå vart innvilga i dag med 7 drag opp Gjelet. Jon-Kristoffer var «våryr» og «knuste» feltet på dei 2 første draga. Han roa ned litt etterkvart, men hadde denne flotte serien: 2.45-2.41 (rekord!!)-2.50-2.55-2.55-2.59-2.55. GeirØ var nr.2 oppover, men av dei som fullførte heilt til bommen var Torbjørn nr.2. Han hadde ein god serie med start på 3.10 for så å ete seg sakte men sikkert ned til 3.01. Vidar imponerer også med å nesten følgje han heile vegen. Jens-Ole, Norvald og Kjell ligg i ei klynge litt bak desse, med Johnny «på halen» av den gjengen.

Ver og føre: Mildt og lett regn. Ca. 6 grader og isfritt på vegen. Flott!

————————-
21.02.2019:
Det er vinterferie-veke, men det gjekk utover kun nokre få, for frammmøtet var godt i dag og! Her er gjengen: GeirN, GeirØ, Jon-Kristoffer, Johnny, Kjell, Norvald, Torbjørn og Vidar.

I Gjelet var det gode forhold og karane meinte at 7 turar opp måtte vere økta i dag og. Dvs. nokre kutta ned på lengda med å springe dei 3 siste opp til svingen. Jon-Kr. held koken og levert tidenes beste serie for vår gjeng. Høyr berre her: 2.39 (rekord)-2.45-2.39-2.49-2.46-2.45-2.45. Det vart god luke bakover der GeirØ i starten låg som nr.2, men vart mot slutten forbisprungen av GeirN og Torbjørn. Desse no var mykje like – Geir som regel først. Tider for desse var mellom 2.55 og 3.02. Elles hadde nokre ein tung dag, men felles for alle var at det var lite igjen når vi var ferdig…

Ver og føre: Det er nesten vår. Norvald t.d. stilte i T-skjorte! Ca. 7 grader og overskya. Det er berre lekkert!

————————-
28.02.2019:
Rapport kjem seinare.

————————-
07.03.2019:
Rapport kjem seinare.

————————
14.03.2019:
Då var vi endeleg på Førde Stadion! Det betyr at det går mot vår. Ver og føre var flott og desse var på plass: Jon-Kristoffer, Kjell, Norvald, Torbjørn og Vidar.

Det er ofte ein god plan å ikkje starte for hardt – uvant med dekket som ein er. Likevel vart det ei solid økt og nokre kjende nok dette i leggane etterpå. Økta var sånn: 2000-1500-1000-1500-2000m. Pausane var sånn 1,5 – 2 min. Det var Jon-Kr og Torbjørn som hadde teten heile vegen. Bakover vart det etterkvart litt avstandar og det var vel Vidar som helt ut lengst. Tidene i tet var slik: 7.51-5.51-3.40-5.44-7.39. Det er sterkt når det er snakk om første økt!

———————-
21.03.2019:
Baneløparane var på plass igjen. Denne gongen var det ikkje så mange som vi pleier. Torbjørn var einaste mann ut frå Everket, men fekk etterkvart følgje av 2xNavelsaker. Og sanneleg dukka Jørund Hammersvik opp og vart med på økta.

I dag var det 1000m-intervallar som skulle gjennomførast. 6 stk. var menyen, og som vanleg var det start kvart 5.min. Det synte seg fort at Jørund og Jon-Kristoffer «fann tonen» og hadde ein frisk duell i tet. Ein start høveleg i tet med 3.55, men etterkvart gjekk det fortare 3.50-3.45-3.45, 3.43 før Jørund drog til med 3.30! Her måtte Jon-Kr. gje nokre meter, men likevel solid av 16-åringen.- Torbjørn imponerer også med denne serien: 4.00-3.55-3.50-3.47-3.45-3.53. KJell N var med på dei 2 første, men gjekk så ned på 600m-drag. Det er slike «goder» ein får når ein er komen opp i ny klasse!

Ver og føre: Ja, det var nokre plussgrader og elles fint ute.

—————————
28.03.2019:
Ja, det er fortsatt banetrening vi driv på med. I dag var det 5 stk. på plass: Geir, Jens-Ole, Johnny, Jørund og Torbjørn.

Langintervallar i dag og var det som vart bestemt. 4x1500m – start kvart 8.min. Opplegget var at ein skulle spring ned tida med 5 sek kvar gong. Som venta var det Jørund som vart «hare». Han hadde grei leiing til duoen Torbjørn og Geir. Eit stykke bak der låg Jens-Ole og til slutt Johnny som er «på tilvenning» etter over 1 mnd skade-mareritt. Jørund hadde desse tidene på dei 3 første: 5.50-5.42-5.38. Torbjørn og Geir omtrent slik: 6.03-5.52-5.45. På siste draget tøffa Torbjørn seg skikkeleg og vann heile greia etter ein solid sluttspurt. 5.29 og 5.31 på dei to i tet let seg høyre! Jens-Ole låg på ca. 4.05- og Johnny 4.20-fart. Ei kjekk økt vart det, og alle var einig om at dette gjorde godt!

Ver og føre: Vindstille, regn og ca. 8 grader. Førde Stadion treng renovering for dekket er potte-tett.

———————————
04.04.2019:
Ja, der kom våren, og det med eit smell! I fantastisk ver var desse på stadion i dag: Geir, Jens-Ole, Johnny og Norvald.

Dagens økt var slik: 4x1000m + 4x500m. Dvs. det var berre Vidar og Jens-Ole som fullførte den menyen. Geir, som skal springe full-maraton på Rett Vest til helga, køyre dei «foredlingsøkt» med 400 og 200m drag med gode pausar. Johnny, som er langt nede på formstigen, måtte korte inn på dei to siste 1000m meterane. Og Norvald kom også etterkvart i den kategorien. På siste 500m draga derimot var Jens-Ole og til slutt Johnny i tet. Her er tidene i tet: 4.04-4.00-3.59-4.00-1.54-1.56-1.52-1.47. Dette var kjekt, sjølv om det kostar!

Ver og føre: Ca. 15 grader, sol og lett vind frå aust. SÅ FLOTT!!!

————————————
11.04.2019:
Nok ein fin dag på stadion og «familien» blir stadig utvida. I dag var Athur Hegrenes også med 🙂 Dermed var det desse som var på plass: Arthur, Geir, Jens-Ole, Jon-Kristoffer, Johnny, Kjell og Norvald.

Først må vi skryte av Geir som tok 2.plassen på heilmaraton på Rett Vest i Florø laurdag. 3.13 er sterkt uten særleg oppladning 🙂
Økta i dag var ein klassikar: 8x500m (start kvart 3.min). Jon-Kr. var lett på foten og skaffa seg ei solid luke. Tidene hans låg melom 1.36-1.38. Geir var nr. 2 heile vegen. Også han sprang jamnt med tider rundt 1.45. Norvald var hissig i starten, og heldt neste følgje med Geir. Men på 4. draget lugga det i hamstring, så dermed var det ut men han! Vidare bakover var Vidar, Johnny og Jens-Ole ganske jamne med tider rundt 1.50. Kjell, som er starta på ein medisinkur, prøvde seg litt fram og rapporterte om framgang.

Ver og føre: Litt sur vind frå vest. Elles klarver og flott å springe.

———————————
25.04.2019:
Etter ein velfortent påskeferie var karane på plass igjen på Førde Stadion. I dag var desse her: Arthur, Jens-Ole, Johnny, Kjell og Vidar.

Det er fleire som skal i elden i helga, i gater i Bergen og stafett i Olden, så no er sesongen verkeleg i gong. For å få litt fart i gamle bein vart det køyrt ei økt med meir fart enn vanleg.
10x300m m. 100m gangpause. Dette passa Johnny best, men Jens-Ole var oppe på sida på enkelte drag. Tidene i tet: 61-60-59-59-59-59-59-58-58-57. Sjølv om det lugga litt i hamstring på fleire, kom alle seg igjennom utan strekk.

Ver og føre: Det er sommar. 17 grader med ein hissig vind frå aust.

———————————-
02.05.2019:
I dag skjedde det at berre 2 møtte til treninga, og dei fann ikkje kvarandre! Av ulike årsaker hadde mange gyldig fråvær i dag. Johnny tok ut åleine frå Energi-bygget, og møtte ingen når han kom bort på stadion. Etter litt småjogging rundt bana reiste han tilbake til mølla på Energibygget og køyrde intervallar der. Men, det synte seg at Geir om rett etterpå og fann heller ingen!

Ver og føre: Det var ein sur dag med snø i lufta og vind frå nordvest. Ikkje som før ei veke sidan nei.

———————————
16.05.2019:
Etter litt «til og frå» var det igjen en god gjeng på stadion i dag. på ein nydeleg sommardag møtte desse: Arthur, Geir, Johnny og Torbjørn.

Planen for Geir og Torbjørn var 6x1000m og det gjorde dei. Geir var først på alle med desse tidene: 3.55-3.54-3.50-3.40-3.44-3.41. Torbjørn heldt følgje med dei 3 første og fortsette i same tempo derfrå. Johnny køyrde 3×1000+600+2x400m. Kjell og Arthur var med på delar av draga. Godt å vere i gang igjen med denne typen trening!

Ver og føre: Sol og over 20 grader. Det var uvant varmt, men du verden dette er jo flott.

———————————
23.05.2019:
Ja, det nærmar seg sommar og sesongen er godt i gang. Litt rusk i maskineriet til fleire, men dei fleste kjem seg på plass på stadion. I dag var det desse som møtte: Geir, Jens-Ole, Kjell, Magne og Torbjørn.

Økta var som sist: 6x1000m (start kvart 5.min). Etter det referenten forstår var Geir i tet, hadde desse tidene: 3.53-3.47-3.46-3.41-3.38-3.37. Torbjørn var nr.2 heile vegen. Han starta rett under 4.00 og jobba seg nedover til 3.42. Det er solid! Jens-Ole følgde Torbjørn på dei 2-3 første, men måtte så gje nokre meter. Men også han fullførte. Ein fin serie!
Ver og føre: Lettskya, lett vind og ca. 15 grader. Flott altså!

*****************************************************************
HAUSTEN 2019:

Vi har bak oss ein vår og sommar med varierande form og deltaking blant gjengen. Nokre har konkurrert og trena mykje – andre har vore meir eller mindre «ute». Uansett – no er vi på trappene med ein ny treningssesong og alle må no starte på «sitt» nivå.
———————————

29.08.2019:
Då var 3 karar på plass på Førde Stadion til første fellesøkt i dette semesteret. Det var Geir, Johnny og Vidar.

Vi starta med det som (på papiret) skulle vere ei lett økt. Om det vart det, kan diskuterast. 2x1000m + 5x500m. Som vanleg start kvart 5.min på 1000m og kvart 3.min på 500m. Geir var som venta først på alle. Tidene var omtrent sånn: 3.40, 3.35, 1.45, 1.43, 1.47, 1.38, 1.42. Vidar var nr. 2 stort sett heile vegen, men fekk «det» litt på slutten. Johnny var like bak og litt føre Vidar på slutten.
Uansett: Godt å komme i gang igjen.

Ver og føre: Lettskya – nesten vindstille, 16 grader og dermed nesten perfekt.

————————————
26.09.2019:
Etter litt «av og på» med få eller ingen på treningane var det igjen ein god gjeng samla på Førde Stadion. Dette var: Harald, Jens Ole, Johnny, Kjell, Torbjørn og Vidar. Vi kan her ynskje velkommen ein «ny» kar: Harald Holmefjord. Sprek 60-åring med bakgrunn frå sykkel, Klatring, friidrett m.m. Elles er det strålande at Torbjørn er på plass igjen – kun få veker etter operasjon.

Økta i dag var slik: 2x1000m + 4x500m. Pausar som vanleg. Ein venta at det måtte bli Jens Ole som måtte ta ansvar og vere hare. Men, her yppa Harald seg på første og var så vidt først. Det kosta, så på dei neste måtte han roe ned, for så å komme igjen og vinne siste. Tidene i tet: 4.00-3.54-1.50-1.49-1.48-1.44. Vidar var jamnt solid og deretter var det Kjell og Johnny som bytta på.

Ver og føre: Ca. 17 grader, sol og vind frå aust. Strålande ettersommar.

————————————
03.10.2019:
Då er vi runda inn i oktober, og fineveret har vi med oss. Og frammøtet er betre enn nokon gong i haust. I dag kom det ein heilt «ny» kar: Åge Aasen. Sykkelist med god kondis. Også Arthur H. dukka opp i dag, så då var vi sju: Arthur, Harald, Jens Ole, Johnny, Torbjørn, Vidar og Åge.

Det vart lengre intervallar enn sist med denne menyen: 2000-1500-1000-500m (Pausar 2,5-2-1,5 min). Det var Vidar og etterkvart Jens Ole som tok teten. Så på 1500m var Arthur med på leiken, men Jens Ole var først, noko han også var på 1000m. På siste draget skulle Torbjørn teste om maskina tolte litt trykk og dro til med siger. Tidene i tet: 8.20-6.06-3.53-1.45. Lenger bakover var det litt «Ymse», men alle kom seg vel igjennom.

Ver og føre: Ca. 14 grader sol og vindstille. Aldeles strålande tilhøve 🙂

——————————
10.10.2019:
Det er haustferie og det synte igjen på frammøtet. Kun Johnny og Åge møtte. Reknar med at vi ser fleire fjes neste veke.

Vi er på Førde Stadion og her er det fredeleg å vere. Det var køyrt 5x1000m intervallar. Start kvart 6.min. Karane var ganske like og holdt følgje. På dei 2 siste stoppa Johnny litt før, då den såre hofta «murra» litt.
Tidene låg mellom 4.14 og 4.21. Det var travelt nok, men som vanleg gjorde det godt.

Ver og føre: ca. 10 grader, litt vind frå aust og opphaldsver.

——————————-
17.10.2019:
Ja, no snakkar vi: Solid frammøte med 7 stk. likar vi, og når ver og føre er prima, vart det ein fin dag på Førde Stadion. Dei som møtte i dag var: Jens ole, Johnny, Kjell, Torbjørn, Vidar og Åge. Og så kan vi ynskje velkommen ein ny gubbe: Ole Ingar Haaland. Han er fersk i faget i vår «bransje», man har bak seg nokre halvmaratonløp. Velkommen til deg!

Sjefstrenaren hadde tenkt ut ei «klassisk» økt: 8x500m. Start kvart 3. min. Dette har vi sprunge før, og ved å bla bakover til tidlegare år, ser vi at vi har litt å strekke oss etter. Det starta pent der Johnny drog feltet inn til 2.03. Så kom Torbjørn med større og større tempo: 1.59-1.57-1.54-1.51-1.47-1.44. Då var det slutt og på siste draget var Jens Ole først med god klaring. Tid: 1.47. Elles er å nemne at gjengen helt seg imponerande samla med tider under 2.00 på alle draga. Ole Ingar er på tilvenning, og tok litt færre drag enn vi andre.

Ver og føre: Ca. 11 grader, overskya og vindstille. Nesten perfekt!

——————————-
24.10.2019:
Nok ei god økt er lagt i «banken» for godt grunnlag for den kommande sesongen. I dag var det igjen solid frammøte med 8 stk. Det var: Arthur, Geir, Harald, Jens-Ole, Johnny, Torbjørn, Vidar og Åge.

Det vart langintervallar i dag: 5-4-3-2-1 runder på stadion. Pausar 2,5-2-2-1,5min. Geir var som venta først på alle med unntak av siste. Her var det full omkalfatring der langsprintaren Harald var først. Tidene i tet var slik: 7.56-6.10-4.30-2.50-73. Torbjørn var nr. 2 på dei 4 første. Vidare låg ein fint fordelt bakover omtrent sånn: Jens-Ole, Arthur, Johnny, Åge, Harald. Vidar kom litt seint og var med på dei 3 siste. På grunn at dette måtte han ha «straffetrening» i Gjelet, der også Torbjørn vart lokka med. Her sprang dei 3 gonger opp til bommen på desse tidene: 3.16-2.10-3.03. Solid dose på begge og iallefall Torbjørn 🙂

Ver og føre: Ca. 11 grader overskya og vindstille. Flott for løparar!

——————————-
01.11.2019:
Fortsatt gode forhold på stadion, sjølv om det snart er mørkt når vi er der. I dag var vi 7 stk. Det var: Geir, Jens-Ole, Johnny, Kjell, Torbjørn, Vidar og Åge.

Det vart pyramideintervall i dag. 200-400-600-800-1000-800-600-400-200. Pausane var 100m gangpause mellom draga (ca. 1,5 min). På dei 2 første fekk Johnny lov å vere først, men så kom Geir for fullt og var først på resten. Torbjørn hadde stort sett 2.plassen, med Jens-Ole og Vidar deretter. Tidene i tet: 38-83-2.10-2.57-3.39-2.06-77-35. For alle langløpar-gutane er dette uvant trening, men det trengs, så alle var eining om at økta gjorde seg.

Ver og føre: ca. 7 grader – vindstille og gråver. Igjen ein god dag for vår aktivitet.

——————————–
07.11.2019:
Eit lett pudderlag med snø gjorde det usikkert om det kunne bli banetrening, men det vart det. Flott oppmøte i dag også – 8 stk: Geir, Harald, Jens-Ole, Johnny, Kjell, Torbjørn, Vidar og Åge.

Dagens økt vart ein gammal klassikar: 1000m-intervallar. 6 stk. skulle det vere, og det vart det for dei fleste. Geir var først som venta, men hadde selskap av Torbjørn iallefall i starten. På 3.plassen var det Vidar som hadde i starte, men så kom Jens-Ole sigande. Tidene i tet var omtrent sånn: 3.58-3.53-3.50-3.50-3.47-3.43. Torbjørn imponerer stadig med solide tider. Her er hans serie: 3.58-3.53-3.50-3.52-3.51-3.50.

Ver og føre: Det var litt under null grader, vindstille og lettskya. Banedekket på Førde Stadion var nesten betre enn vanleg med nokre millimeter snø og godt feste. Kjekt!!!

——————————-
14.11.2019:
Fortsatt er Førde Stadion brukande for oss. Igjen ein god gjeng på plass: Arthur, Harald, Jens-Ole, Jon Kristoffer, Johnny, Kjell, Torbjørn og Vidar.

Ja, sjefstrenaren trudde det var for glatt, men faktum var at Førde Stadion var heilt ok å springe på også i dag. Dermed vart vi der til same økta som vi hadde for 3 veker sidan: 5-4-3-2-1 runder. Pausar: 2,5-2-1,5-1,5. Med ein god 16-åring i feltet var «harejobben» i boks, og den skjøtta Jon Kr. godt. Vi som låg lengst bak slapp iallefall unna med mindre meter enn før (!!!). Jon-Kr var først på alle draga. Torbjørn var nr.2 på alle med unntak av den siste. Vidar og etterkvart Jens-Ole hadde 3.plassen. På siste draget var som venta Harald på hugget og tok 2.plassen. Tidene i tet var omtrent sånn: 7.59-6.07-4.30-2.53-77. Torbjørn sin serie var slik: 8.09-6.17-4.39-2.49-81. Elles var det «kjekt» lenger bak også med stadige vekslingar om plasseringane.

Ver og føre: Ca 2 minus og vindstille. Det var flott!

———————————
21.11.2019:
Jammen vart det endå ei baneøkt! Sjølv om det i dag var litt «ruklete» gjekk det fint å springe her. Dei som var så heldig å få vere med på dette var: Harald, Johnny, Kjell, Torbjørn og Vidar.

Etter litt prat om den kommande 24-timars økta til Torbjørn, vart sjefstrenaren sin opprinneleg plan følgt: 8x500m (start kvart 3. min). I mangel av ein knall(god)hare måtte ein ta ansvar sjølv. Harald var først på nr.1 og 2. Johnny på nr.3,4,6 og 7. Vidar var først på 4. og siste. Torbjørn var like i nærleiken, men grov nok ikkje så djupt for å vere med i denne farten. Farten låg mellom 1.56 og 1.59. På dagens føre er det godkjent.

Ver og føre: ca. 2+grader, vindstille og som sagt litt ujamnt føre.

————————————-
28.11.2019:
Ikkje langt frå tidenes haust dette. Igjen ein fin dag for springing og igjen var Førde Stadion ok for oss. I dag kom også Jørund Hammersvik, så dermed var «haren» i boks. Geir og Torbjørn deltok i helga på 24-timers løp i Oslo. Ei påkjenning av dei skjeldne. Men likevel var Torbjørn på plass i dag. Då var vi desse: Harald, Jens-Ole, Johnny, Jørund, Kjell og Torbjørn.

Økta var kjent for dei fleste og slik: 2000-1500-1000-500m. Pausar: 2,5-2-1,5min. Jørund tok ansvar og teten, men utruleg nok la Torbjørn seg i hælane! Deretter følgde Jens-Ole, Kjell, Johnny og Harald. Sånn var det omtrent heile vegen, men på siste draget var Jens Ole i støtet og først med Johnny i hælane. Tidene i tet: 7.57-5.51-3.46-1.46.

Som sagt: Det er så smått utruleg at ein kan ha sånn flott dag på denne tida av året. Ca. 0 grader, litt vind frå nordaust og klarver.

———————————–
05.12.2019:
Vi skriv desember, men likevel sørger vergudane for at det er springeføre til oss på Førde Stadion. I dag var det ein betydeleg mindre gjeng som møtte, så mange hadde fråvær av ulike grunnar. Det var desse: Geir, Jens-Ole og Vidar.

Ass.sjefstrenar Vidar hadde tenkt ut at 6x1000m måtte passe i dag. Ein starta høveeleg roleg, men det vart fortare etterkvart. Vil tru at det var Geir som var først, iallefall på slutten. Tidene var sånn ca. 4.17-4.15-4.10-3.58-3.52-3.46.

Ver og føre: Sjølv om det hadde vore dårleg ver i fleire dagar var det faktisk ok under økta.

————————————–
12.12.2019:
Det har vore eit ufyseleg ver siste dagane. Sjølv om veit at det ikkje betyr noko som helst når det skal trenast, vart det nok litt slik i dag, då nokre valde ei mølleøkt i staden for. Likevel 3 tøffingar var på plass på stadion: Harald, Jens-Ole og Kjell.

Som Jens-Ole sa: «Når katten er vekke, dansar musene på bordet!». Oversatt: Det kom til syne ein ny trenar: Harald som ikkje likar lange løp, tok kommandoen og sette gjengen i gang med noko som ingen av dei 2 andre nokon gong hadde prøvd: 80m sprintdrag!!! 10 sånne var det og 2 seriar, altså 20 drag. Alle veit at for gamle skrog er dette skummelt, men etter som ryktet går, kom alle frå det uten mèn. Ein vil tru at trenaren var først.

Ver og føre: Det regna og bles, men fullførte gjorde dei.

————————————-
19.12.2019:
Etter er ein flott haust der vi har vore på Førde Stadion var det i dag såpass glatt der at vi snudde nasa mot Hundvebakkegjelet og motbakken der. I dag var det 4 som møtte. Det var Geir Øygard, Jens-Ole, Kjell og Torbjørn.

Ja, motbakken i Gjelet er frykta og var like tung i år som tidlegare år. Ein starta «sympatisk» med kun 4 drag. Jens-Ole og Torbjørn heldt følgje med desse tidene: 3.09-3.07-3.05-3.02. GeirN låg litt bak i starten, men på dei to siste var han med heilt opp. På siste draget klart først med 2.57. Det betyr at han blir å rekne med utover.

Ver og føre: Ca. 0 grader vindstille og fint.

Då tek vi juleferie, men trene gjer vi sjølvsagt 🙂 Vel møtt tilbake torsdag 2.januar!